Waxaa sii kordhaya khasaaraha dhimasho ee ka dhashay daadadka ka dhashay roobabka ka da’aya dalka Kenya iyo fatahaadaha ay sameeyeen wabiyada mara dalkaasi, kuwaas oo gallaaftay nolasha inka badan 220 ruux oo Kenyaan ah.
Tirakoobkii ugu dambeeyay ee ay soo saartay wazaaradda arrimaha gudaha ee dowladda Kenya ayaa lagu sheegay in dhimashadu sii marayso 228 xubnood, kaddib markii 24-kii saac ee lasoo dhaafay gudaha waddankaasi laga diiwaan geliyay 9 dhimasho oo cusub.
Tiro intaasi la eg ayay wazaaraddu sheegtay in dalkaasi laga diiwaan geliyay maalmihii Sabtida iyo jumcaha ee lasoo dhaafay, taas oo keentay in numberka dhimasho uu sii kordho, waxay sidoo kale wazaaraddaasi sheegtay in la hayo dhaawacyada 164 kale, kuwaas oo ay saamayn ku yeesheen daadadka iyo fatahaadaha dalkaasi ku dhuftay.
“228 qof ayaa sababo ku aaddan isbadelka cimilada oo aad u daran nafooda ku waayay, 9 xaaladood oo dhimasho ah ayaa la diiwaan geliyay saacadihii ugu dambeeyay ee tirakoobka”,. waxaa sidaas lagu yiri nuqul ka mida qoraal kasoo baxay wazaaradda arrimaha gudaha ee dowladda Kenya.
Dhanka kale, iskuullada iyo xarumaha waxbarashada ee dalkaasi ayaa wali xiran, madaxweynaha wadankaasi Kenya, William Ruto ayaa saacadihii lasoo dhaafay khudbad uu jeediyay ku sheegay in dib loo dhigay furitaanka iskuullada, isaga oo aan cayimin wax muddo ah.
About The Author
