Wazaaradda difaaca ee xukuumadda islaamiga ah ee Afghaanistaan ayaa gelinkii dambe ee maanta faafisay muuqaallo koob kooban oo ay kusoo bandhigayso gurmadyo ay ciidamada imaaarada islaamiga ah u fidiyeen dadka reer Afghan ee musiibada daadadku saameeyeen.
Barta wazaaraddu ku leedahay aaladda X, ayaa lagu faafiyay muuqaallo muujinaya gurmad isugu jira daadgurayn iyo kuwa dib u dhis ah oo ciidanka Imaarada islaamiga u fidinayaan dadka rayidka ah ee daadadku saamaynta ku yeesheen.
Cagafcagafyada ciidanka mujaahidiinta ayaa muuqaallada lagu daawan karaa iyaga oo dib u dhis ku sameynayo waddooyinkii ku burburay daadadka ku dhuftay magaalooyin ka tirsan gobolka Baghlan ee dhaca waqooyi bari dalka Afghanistan.
Sidoo kale waxay ciidamada mujaahidiintu goobaha halista ah ka samata bixinayaan dadka dhibaatadu saamaysay, ciidamada Imaaarada ayaa intii ay taagnayd musiibada daadadkaan waxay gurmadyo la taaban karo ka gaysteen gurmadka daadguraynta ah ee loo sameeyay dadka tabaaleysan, waxayna gurmadkaas uga qayb qaateen diyaarado kuwa qumaatiga u kaca oo ay ku qaniimeysteen halgankii dheeraa ee ay lasoo galeen Isbahaysiga Nato ee uu Maraykanku hoggaaminayay.
Daadadkan oo 12-kii bishan May ku dhuftay deegaanno badan oo dhaca waqooyiga dalka Afghanistan, ayaa waxaa ku dhintay 315 qof, halka ay waxyeello kala duwan kasoo gaareen 1,630 xubnood oo kale, waxaa sidoo kale ku burburay 665 guri, halka ay gallaafteen nolasha inka badan 1000 neef oo ari ah.
Hoos Ka Daawo Sawirrada Gurmadka.
About The Author
