Xiisado siyaasadeed oo xooggan ayaa maanta ka taagan deegaanno ka tirsan gobolka Awdal ee dhaca waqooyiga Somalia, kaddib markii maleeshiyaadka maamulka ashahaada la dirirka ah ee Somaliland ay xabsiga dhigeen xildhibaan murtad ah oo kasoo jeeda gobolkaasi.
Wararka Awdal laga helayo waxay sheegayaan in maleeshiyaad hubeysan oo ka gadoodsan xarigga Maxamed Abiib oo ah nin si wayn u mucaaradsan nidaamka Muuse Biixi ay maanta xirteen waddada isku xirta magaalooyinka Hargaysa iyo Boorama.
Muuqaallo iyo sawirro lagu faafiyay baraha bulshada ayaa muujinaya xiisadda ka taagan duleedka Boorame, maleeshiyaadka Maxamed Abiib taageersan ayayna mudo saacado ah gaadiid badan ku xannibanyihiin halka lagu magacaabo Gorayo-cawl ee dhacda duleedka magaalada sida ay ilo-wareedyo dhanka deegaanka ah soo sheegeen.
Wararku waxay intaasi ku darayaan in maleeshiyaad kale oo taabacsan maamulka Muuse Biixi oo ku hubeysan gaadiidka nooca dagaalka ay iyaguna soo gaareen aagga gaadiidka lagu xiray, dadka rayidka ah ee waddadaas ku xayiran ayaa ka baqdin qaba in xiisadu isku beddesho gacan ka hadal oo uu iska hor’imaad dhexmaro labada dhinac ee kala taabacsan Muuse Biixi iyo Maxamed Abiib.
Dhinac kale muuqaallo iyo sawirro laga soo duubay magaalada Boorama ee xarunta u ah gobolka Awdal, ayaa muujinaya sida uu maanta u xiran yahay suuqa ganacsi ee magaaladaasi.
Muuqaallada qaar ee lagu faafiyay baraha bulshadu waxay muujinayeen gaadiid kuwa ciidanka ah oo ay leeyihiin maleeshiyaadka maamulka ashahaada la dirirka Somaliland oo lagu arkayay waddooyinka suuqyada magaalada, waxaana socda abaabulka dibad-baxyo ka dhan ah xarigga lagula kacay xildhibaanka u xiran maamulka Hargaysa.
Isniintii shalay uun ayay ahayd markii maamulka uu madaxa u yahay murtad Muuse Biixi Cabdi uu garoonka diyaaradaha ee Hargaysa ka xiray Maxammed Abiib oo ka mid ah xubnaha golaha dawaaqiidda ee maamulkaasi, ninkan ayaa ka mid ah xubnaha sida wayn mucaaradka ugu ah maamulka Muuse, xariggiisa ayaana kiciyay xiisadda siyaasadeed ee maanta ka taagan gobolka Awdal.
About The Author
