Shaqaalaha ka howlgala garoonka diyaaradaha caalamiga ah ee magaalada Nairobi ee caasimadda dalka Kenya, ayaa maanta sameeyay shaqo joojin rasmi ah, taasi oo si wayn looga dareemayo guud ahaan waddankaasi.
Kenya Airways ayaa maanta shaacisay in shaqo joojinta ay sameeyeen shaqaalaha garoonka caalamiga ah ee Jomo Kenyata, ay sababtay dib u dhac wayn oo ku yimid duulimaadyada iyo in la baajiyo rakaabka ka dhoofaya waddankaasi iyo kuwa kasoo degaya.
Muuqaallo lagu baahiyay barta X ayaa muujinayay boqollaal rakaab ah oo safaf ugu jira terminalka garoonka caalamiga ah, kaddib markii shaqo joojintu dhaqan gashay saqdii dhexe ee xalay.
Tobannaan ka mid ah shaqaalaha garoonka ayaa saaka isku soo bax sameeyay, si ay uga dhiidhiyaan heshiiska dowladda, waxayna ku dhawaaqayeen “Adani waa in uu baxaa”, waxaa nuqulka muuqaalkan baahiyay teleefishanka maxaliga ah ee lagu magacaabo Citizen.
Ciidamo boolis ayaa la arkayay iyaga oo isku dayaya inay is taag ku sameeyaan shaqaalaha dibadbaxa dhigaya, waxaana lasoo wariyay in ciidamada booliska ay xireen qaar ka mid ah shaqaalaha ka howlgala garoonka diyaaradaha ee caasimadda Kenya.
Tallaabadan ayaa ka dambeysay kaddib markii shaqaalaha madaarka caalamiga ah ee Nayroobi ay ka biya diideen heshiis ay dowlada ku eedeeyeen oo garoonka loogu wareejinayo shirkad lagu magacaabo (Indian Adani Airport Holdings), oo ah shirkad gaar ah oo laga leeyahay waddanka Hindiya.
Shaqaalaha garoonka ayaa ka carooday qorshaha dowladda Kenya ay ku doonayso inay ku wareejiso maamulka garoonka diyaaradaha ugu weyn dalka Kenya ee Jomo Kenyatta, qorshaha xukuumada uu madaxa ka yahay Ruto ayaa lagu sheegay in uu yahay in shirkadda Hindiya laga leeyahay garoonka laga kireeyo muddo 30 sano ah, iyaga oo ku andacoonaya inay ballaariso oo ay horumariso, balse go’aanka dowlada William Tuto ayaa la kulmaya diidmo xoogan iyo in dhaqdhaqaaqyadii duulimaad uu maanta si rasmi ah u joogsado.
Shaqaalaha ka howlgala garoonka ayaa sheegay in heshiiskaasi oo lagu dhawaaqay bishii July uu horseedi doono shaqo la’aan soo wajahdo shaqaalaha Kenyaanka ah iyo in madaarka laga howlgaliyo oo la keeno shaqaale aan Kenyan ahayn.
Maxkamadda sare ee Kenya ayaa Isniintii lasoo dhaafay si ku meel gaar ah u hor istaagtay soo jeedinta dowladda ee ah in shirkadda Adani ee laga leeyahay Hindiya muddo 30 sano ah lagu wareejiyo maamulka garoonka caalamiga ah ee Jooma Kenyaatta.
About The Author
