Madaxweynaha maamulka kumeel gaarka ah ee dowladda xabashida Itoobiya ka dhistay ismaamulka Tigray ee waqooyiga dalkaasi, ayaa si adag uga hor-yimid xilka qaadis iyo eryid uu ku sameeyay hoggaamiyaha jabhadda TPLF ee ay leeyihiin dadka Tigreegga, si wayna u mucaaradsan siyaasadda maamulka Abiy Axmed.
Warsaxaafadeed uu soo saaray maamulka kumeel gaarka ah ee ismaamulka Tigray-ga ayuu ku sheegay in hoggaanka xisbiga TPLF uu laba garab u kala jabay, mid ka mid ah garabyadaasna uu qabtay shir uu ku sheegay mid sharci darro ah, bayaanka ayaa sidoo kale lagu sheegay in tan iyo markii shirkaas qabsoomay ay garabka kale ku mashquulsanaayeen kala qaybinta xisbiga iyo sidoo kale in fowdo la abuuro waa sida uu hadalka u dhigaye.
Garabka uu hogaamiyo Debretsion Gebremichael ayuu ninka la eryay ee taabacsan Abiy ku eedeeyay in uu si rasmi ah ugu dhaqaaaqay afgambi, hanjabaad joogta ahna u jeedinayo hoggaanka maamulka kumeel gaarka ah, waxayna ku goodiyeen inay qaadi doonaan tallaabo ka dhan ah Debretsion Gebremichael.
“Maamulka ku-meelgaarka ah ee Tigraay ma aqbali karo, mana u dulqaadan doono ficilladan xad-dhaafka ah, maadaama garabkaani uu si qaldan u fasirtay dadaalladii lagu ilaalinayay midnimada dadkeenna inay daciifnimo tahay, maamulka ayaa qaadi doonaa tallaabo sharci ah oo ka dhan ah hogaanka garabka ku dhisan kala qaybinta iyo duminta, waxaanna rabnaa inaan u caddeyno dadkeenna in garabkaasi iyo sidoo kale hoggaankooda ay mas’uul ka noqon doonaan wixii cawaaqib ah ee ka dhasha ficilladooda”, ayaa lagu yiri nuqul ka mid ah bayaanka garabka Abiy Axmed ee TPLF.
Warsaxaafadeedkaan kasoo baxay madaxweynaha maamulka kumeel gaarka ah ee Tigray, Getaachow Reda ayaa kusoo beegmaya xilli xiisad u dhaxaysa maamullada Addis-ababa iyo Asmar ay taagan tahay, garabka Getaachow Reda ayaana ah mid taabacsan Abiy Axmed, halka hoggaamiyaha TPLF-na Debretsion Gebremichael uu taabacsan yahay dhanka dowladda Eritrea.
Dadka wax taxliiliya waxay sheegayaan in dagaalka soo socda ee dhexmari doono dowladaha Itoobiya iyo Eritrea uu noqon doono mid ku saleysan kala taageeridda labada garab ee TPLF, kuwaas oo hadda khilaafkoodu maray meel xasaasi ah.
About The Author
