Maleeshiyada jabhadda Fano ee kacdoonka millatari kula jirta dowladda federaalka xabashida Itoobiya, ayaa guulo ka sheegtay dagaallo culus oo maanta iyo maalmihii lasoo dhaafay ka socday deegaanno ku teedsan aagga dagaallada iyo rabshadaha hubeysan caanka ku ah ee bariga Gojjam.
Fano waxay sheegatay in maleeshiyadeedu guulo la taaban karo kasoo hoyeen dagaallo culus oo maanta ka dhacay agagaarka Debre Markos ee dhacda bariga Gojjam, halkaas oo ay sheegeen in jab lixaad leh ay ku gaarsiiyeen ciidamada millatariga dowladda xabashida.
Inka badan 70 askari oo ka tirsanaa millatariga ayay maleeshiyaadka jabhadda Axmaaradu sheegeen inay ku dileen dagaalladii cuslaa ee ka dhacay agagaarka Debre Markos, dagaalka xooggiisa ayaana ka dhacay banaanka magaaladaasi.
Dhanka kale, dagaal culus ayaa maanta ka qarxay waddada A2 ee u dhaxaysa magaalooyinka Wichale iyo Dessie ee ismaamulka Amhara, halkaasi kumanaan askar ah oo ka tirsan ciidamada ammaanka Itoobiya la geeyay, si ay u cirib tiraan maleeshiyada Axmaarada.
Faahfaahin rasmi ah lagama helin dagaalladii maanta ka dhacay waddada A2, balse iska hor’imaadyo aad u culus ayaa dhexmaray labada dhinac, ciidanka millatarigu waxay dhankooda wadaan xasuuqyo aan kala joogsi lahayn oo ka dhan ah dadka Axmaarada.
Muuqaallo lagu faafiyay baraha bulshada ayaa muujinayay dad rayid ah oo ku dhintay duqaymaha diyaaradaha Drone-ka Itoobiya, dad ku dhow ilaa 100 qof ayay maalmihii lasoo dhaafay duqaymo ku dileen ciidanka Itoobiya, sida ay soo sheegeen dad goobjoogeyaal ah.
About The Author
