Inta la xaqiijiyay 184 qof oo Falastiiniyiin ah ayaa ku shahiiday duqeymo kala duwan oo dhanka cirka ah oo ay ciidamada Yahuuddu ku garaaceen qaybo ka mid ah marinka Gaza 3-dii maalmood ee u dambeeyay, sida ay soo sheegeen dad goobjoogeyaal ah.
Ilo wareed dhanka caafimaadka ah ayaa xaqiijiyay in 66 xubnood oo ka mid ah 184-ka qof ee shahiiday ay ku dhinteen duqaymo culus oo gudaha Gaza ka dhacay sabtidii shalay oo keliya.
Ragga sida firfircoon usoo tabiya dhacdooyinka Gaza ayaa sheegay in dhowr qof oo Falastiiniyiin ah una badan haween iyo carruur, ay ku dhaawacmeen ilaa laba duqeyn oo Yahuuddu ay ku beegsadeen ilaa saddex guri oo kuyaal xaafadda Abu Iskandar ee dhacda galbeedka jiidda Gaza.
Kooxaha gurmadka degdegga Falastiiniyiinta ayaa dhankooda sheegay inay ku hawlan yihiin baadi-goobka dadka ku hoos jira burburka dhismeyaasha ay duqaymaha ku beegsadeen ciidamada Sahaayinada, kooxo ka mid ah kuwa fidinayay gurmadka caafimaadka ayaa dad dhaawac ah u qaaday cisbitaalka al-Macamdaani ee Gaza, dhaawacyada la qaaday waxay qaarkood ku sugan yihiin xaalado halis ah.
Natiijada isku gaynta shuhadada ku baxay duqaymihii dhacayay 72-dii saac ee lasoo dhaafay waxay kooxaha gurmadka deg degga ah ku sheegeen 184 qof, halka ay jiraan dhaawacyo badan, burbur baahsan ayay sidoo kale gaysteen ciidamada Yahuudda.
Ilo wareedyo kale ayaa soo sheegay in uu shaqada ka baxay cisbitaalka Al-Indonesi oo uusan hadda wax adeeg ah siinin dadka bukaannada ee dhaawacyada qaba, sidoo kale masuuliyiinta caafimaad waxay sheegeen in uu weli howlgab yahay cisbitaalka Kamaal-cudwaan.
About The Author
