Ismaamulka Oromada ee dalka Itoobiya waxaa ka socda dagaallo culus oo dhexmaray maleeshiyada jabhadda xoraynta Oromia ee OLA loo yaqaan iyo ciidamo taabacsan nidaamka Abiy Axmed.
Jabhadda mucaaradaka ah ee OLA warbixin ay soo saartay ayay ku sheegtay in dagaallo culus oo fallaagadoodu la galeen ciidanka xabashida ay ku dileen ku dhawaad 60 askari oo Itoobiyaan ah.
Maleeshiyada jabhaddan ayaa sheegay inay cagta mariyeen xero ciidan oo ku taala galbeedka mandiqadda Guji, gaar ahaan Dubbisaa oo dhacda duleedka degmada qarcaa, waxay sheegeen in ciidamadii halkaas ku sugnaa iyo sidoo kale masuuliyiinta xisbiga Abiy ee Barwaaqo ay ka firxadeen xerada.
Howlgalka labaad ayay maleeshiyadu ku sheegeen inay ka fuliyeen Heemma Kinshoo oo ka tirsan degmada Dugda Dawaa ee isla mandiqadda Guji, waxay sheegeen in weerarkan ku dileen ilaa 19 askari, sidoo kalena ay dhaawacyo ugu gaysteen ilaa 17 askari oo kale, hub iyo agabyo kala duwanna kusoo furteen.
Sidoo kale maleeshiyaadka jabhadda Oromada ee OLA waxay weerar kale oo culus ku qaadeen xero ciidan oo kutaal Bariga Guji, waxay halkaas ku dileen ilaa 40 askari oo taabacsan ciidanka Abiy, 36 askari oo kale ayay sheegeen in isla weerarkaasi ay ku dhaawaceen, ilaa 8 askari oo kale ayay gacanta kusoo dhigeen sida ku xusan warbixinta OLA, hub iyo agabyo kale ayay ku furteen weerarka.
Weerar 4-aad ayay maleeshiyadu ku qaadeen xero ciidan oo ku taal Bariga Wollega, gaar ahaan degmada Haro Limmuu, khasaare nafeed ma aysan soo werin balse waxay sheegeen inay ku qabsadeen tobaneeyo qori oo Ak47 ah rassaas iyo agabyo kala duwan oo kuwa ciidanka ah.
Weeraradan ayaa kusoo beegmaya xilli dhammaadka bishii lasoo dhaafay ee December 2024 weeraro ay fulisay jabhadda mucaaradka Oromada lagu dilay 250 askari Itoobiyaan ah, weeraradaas oo ka dhacay deegaanno dhowr ah.
About The Author
