Dagaalka culus oo u dhexeeya kooxda fallaagada M23 iyo ciidamada dowladda Jamhuuriyadda Dimuqraadiga Congo ayaa qal qal galiyay nolosha iyo ganacsiga magaalada Goma ee dhacda bariga Jamhuuriyadda Dimuqraadiga ah Koongo .
Sida ay wararku sheegayaan colaadda ayaa gallaafatay nolosha inkabadan 100 qof iyadoo ay ku dhaawacmeen in ka badan 300 halka kumannaan qof, oo ay ku jiraan ganacsato Soomaaliyeed ay ku qasbanaadeen in ay guryahooda ku xanibmaan. Magaalada Gooma oo ah xarun ganacsi oo muhiim ah ayaa hadda wajahaysa xaalad bini’aadannimo oo aad u daran.
Boqolaal ganacsato soomaaliyeed ah ayaa ku go’doonsan xaafadaha isku raranka ah ee magaalada Gooma waxayna ka baqayaan in ladilo ama laxiro haddii ay banaanka usoo baxaan, dhammaan waddooyinka magaalada ayaa lagu arkayaa dagaalyahannada mucaaradka iyo ciidamada dowladda oo dagaallamaya.
Goob joogayaal ayaa sheegay in ay meydad farabadan daadsanyihiin waddooyinka islamarkaana ay isbitaalladu buuxsameen, mid kamida ganacsatada soomaalida ee bariga Koongo ayaa warbaahinta usheegay in ay hakad ku jiraan dhammaan xarumaha ganacsiga ayna ka baqayaan in hantidooda laboobo haddii ay dagaalladu sii socdaan.
Ganacsatada Soomaaliyeed ee ku sugan Goma ayaa si gaar ah u dareemaya saameynta dagaalka. Qaar badan ayaa lagu khasbay inay joojiyaan ganacsigooda oo ay gabaad galaan maadaama rabshaduhu sii xoogaysteen.
Magaalada Gooma waxaa ku nool bulsho yar oo Soomaaliyeed oo ka shaqeysa ganacsiga shidaalka iyo dhoofinta badeecadaha.
“Ganacsigeennu wuxuu ku tiirsan yahay ganacsiga shidaalka, balse hadda wax walba waa joogsadeen,” ayuu yiri Zubeyr Xaaji , oo ah ganacsade Soomaaliyeed oo la hadlay qar ka mid ah warbaahinta ku hadasha afka soomaaliga.
Wuxuu intaas ku daray in fallaagada M23 ay gudaha u galeen magaalada ka dib markii ay ciidanka koongo ay dib uga gurteen jiidda dagaalka, halka kuwo kale ay dagaal la galeen kooxdan. Inkastoo ganacsatadu ay wajahayaan dhibaatooyin badan hadane Zubeyr wuxuu xusay in aysan jirin wax weerar ah oo si gaar ah loola beegsaday dadka Soomaaliyeed.
Soomaalida ku dhaqan bariga dalka Koongo ayaa leh hanti lagu qiyaaso boqolaal Malyan oo dollar badankoodna waxay ka ganacsadaan shidaalka oo ay isaga kala gudbiyaan dalalka harooyinka afrika waxaase jira soomaali xoogsada oo shaqeysta dheemanta uu dalkani hodonka ku yahay.
About The Author
