Iska hor’imaadkii ugu xoogganaa dhanka hawada muddo 20 sano ah ayaa ka qarxay dowladaha Pakistan iyo Hindia, kaddib toddobaadyo xiisado iyo diyaar garow ah oo dhinacyada u dhaxeeyay.
Ciidanka cirka ee dowlada Hindiya ayaa weeraray dhulka Pakistan maamusho ee ka tirsan mandiqadda muslimiintu leeyihiin ee Kashmir iyo gobolka kale ee Punjab, halkaas oo ay ku dishay 26 xubnood sida la xaqiijiyay.
Pakistan waxay dhankeeda sheegtay inay soo ridday ilaa lix diyaaradood oo nooca kuwa dagaalka ah oo Hindiya leedahay, xukuumada fadhigeedu yahay Islamabad waxay ku hanjabtay inay si adag uga aargudan doonto, waxayna tilmaantay in Hindiya dab ku shiday xiisaddii kala dhaxaysay.
Afhayeen u hadlay militariga Pakistan ayaa shaaca ka qaaday in dhimashadu ay kor u dhaaftay 31 xubnood oo rayid ah halka 46 kalena ku dhaawacmeen duqeymaha ay Hindiya ka geysatay qeybta Pakistan maamusho ee Kashmir.
Xukuumadda New Delhi waxay sheegtay in weerarradeeddu ahaayeen kuwo “ka hortag ah,” kuna beegsatay xarumo ay ku sugan yihiin kooxo hubeysan, balse goobaha ay beegsatay ayaa ah kuwa rayid waxaana ka mida masjid kuyaal Bahawalpur oo ka tirsan gobolka Punjab.
Pakistan way beenisay sheegashada Hindiya ee ah in goobaha duqaymuhu ku beegsadeen ay yihiin kuwa ciidan, balse waxay sheegtay in la beegsaday ilaa lix goobood, ugu yaraan 31 qof oo rayid ahna lagu dilay weerarrada.
Sidoo kale wararku waxay sheegayaan in Pakistan maanta dishay ilaa 15 qof oo Hindiya u dhashay, waxayna sidaas wadarta ku noqotay dhimashada 46 xubnood oo labada dhinac ah.
Xiisadda ayaa soo billaabatay 22-kii Abriil, kaddib dowladda markii Hindiya ay ku eedeysay dhiggeeda Pakistan in ay ka dambeysay weerar lagu beegsaday dad ku sugnaa dhulka Hindiya xoogga ku haysato ee Kashmir, kaasi oo sababay dhimashada 26 qof.
About The Author
