Kooxo hubeysan oo looga shakisan yahay maleeshiyada fallaagada Fano ayaa maalmo ka hor waxay weerareen gaari rayida oo ku socdaalayay mid ka mid ah waddooyinka ismaamulka Oromia ee dhaca waddanka Itoobiya.
Weerarkan ayaa 4-tii bishan May ka dhacay deegaanka Gida Ayana ee dhaca mandiqadda bariga Wollega ee ismaamulka Oromia, qof goobjooge ah ayaa xaqiijiyay in koox hubeysan ay jidka u gashay gaariga ay la socdeen.
Goobjoogaha oo sababo ammaan dartood magacii u qariyay ayaa sheegay in dareewalka gaariga lagu amray in uu joojiyo, cabsi darteena uu si deg deg ah u joojiyay, waxayna taasi keentay buu yiri in dableydu kaxaystaan ilaa 10 qof oo waayeello ku jiraan.
Dadka la qafaashay ayuu sheegay inay kooxdu ku tuhmaysay inay yihiin dad maalqabeenno ah, goor dambe ayuu tilmaamay in lasoo sii daayay laba qof oo ka mid ahaa dadkii la afduubtay, halka weli aan raq iyo ruuxdooda meel lagu sheegin siddeeda xubnood ee kale.
Ismaamullada Itoobiya waxaa muddooyinkii u dambeeyay kusoo badanayay dhacdooyinka afduubka ah ee loo gaysanayo dadka socotada, waxayna taasi keentay cabsi aad u xooggan oo soo wajahda dadka Itoobiyaanka ah, si gaar ahna dadka musaafiriinta ah.
About The Author
