Gariir dhulka ah ayaa laga dareemay inta badan xaafadaha magaalada Nairobi ee caasimadda Kenya iyo kuwa kuyaal nawaaxiga magaaladaasi, dad badan oo ku dhaqan xaafadahaasi ayaa soo sheegay inay dareemeen gariir uu dhulku sameeyay.
Xaafadaha lasoo wariyay in uu saameeyay gariirka dhulka waxaa ka mid ah, Westlands, Parklands, Kangemi, iyo inta badan xaafadaha magaalada ee kuyaal gudaha iyo sidoo kale hareeraheeda oo ay ka mid tahay tuulo lagu magacaabo Mlolongo.
Shabakadda Earthquake Monitor, oo bixiya xogta la xiriirta dhaqdhaqaaqyada uu dhulku sameeyo, ayaa sheegtay in dhaqdhaqaaqyadii ugu horreeyay laga diiwaangeliyay tuulada Mlolongo ka hor inta uusan gaarin xaafadaha kale ee magaalada.
Bulshada Kenyanka ah ee isticmaasha baraha bulshada sida X oo horay loo oran jiray (Twitter(, ayaa saacadihii lasoo dhaafay si wayn u hadal hayay dhacdadan, waxayna qaar ka mid ah sheegeen in goobo kala duwan ay ku sugnaayeen xilliga uu dhul-gariirku dhacayay.
Warbaahinta maxalliga ah ee Kenya waxay sheegtay in dadka Kenyaanka ee Ruiru, Kitisuru, Ruaka, Githunguri, Athi River, Kiambu Road, iyo Kileleshwa ay kasoo xigteen inay aad u dareemeen gariirka uu dhulku sameeyay.
Mid ka mid ah ganacsatada Parklands ayaa warbaahinta Kenya ku yiri “Waxaan ku sugnaa dabaqa saddexaad marka ay wax dhacayeen, Markii hore waxaan mooday gaari weyn oo na ag maraya, balse daaqadaha iyo albaabbada ayaa bilaabay inay gariiraan, waan argagaxnay, dhamaanteen dibedda ayaan u baxnay.”
Waxay dhacdadan kusoo beegantay xilli toddobaadkii hore gariir dhulka ah laga dareemay gobollada xeebta Kenya, sida Mombasa iyo Kilifi, taasi oo cabsi weyn ka abuurtay dadka ku dhaqan magaalooyinka iyo deegaannada dhaca xeebaha.
About The Author
