Shilal baabuur oo lagu le’day ayaa saacadihii lasoo dhaafay laga soo diiwaan geliyay qaybo ka mid ah ismaamullada Kisumu iyo Kajiado ee dalka Kenya, halkaas oo ay ku nafwaayeen inka badan 30 oo Kenyan ah.
Shilka koowaad ayaa ka dhacay Mamboleo oo ka tirsan ismaamulka Kisumu ee dalka Kenya, kaasi oo yimid markii Bas iskuul oo siday dad baroor diiqaya kana yimid Nyahera kuna sii jeeday Nyakach uu rogmaday, taasi oo keentay shilka.
Shilkan waxaa inta la xaqiijiyay ku nafwaayay ugu yaraan 26 qof oo Kenyan ah, halka ay ku dhaawacmeen 28 kale, khasaaraha dhimasho iyo dhaawaca ee shilkaan gaari ka dhashay ayaa marba marka ka dambeysa kasii daraya. Waxaana suuragal ah in khasaaruhu intaasi kasii bato.
Warbaahinta maxalliga ah waxay sheegtay in dadka dhintay ay ka mid yihiin ilaa 10 xubnood oo rag ah, 10 xubnood oo dumar ah iyo ilmo siddeed bilood jira, dadka dhaawacmay waxaa lasoo wariyay in 5 ka mid ah ay xaaladdoodu culus tahay, maydadka dadka dhintay ayaana loo qaaday qolka maydadka la dhigo ee cisbitaalka Jaramogi.
Shilka labaad oo ka dhacay degaanka Korompoi ee ku teedsan jidka isku xira magaalooyinka Kitengela iyo Isinya ayaa gallaaftay nolasha ugu yaraan 7 qof halka ay ku dhaawacmeen siddeed kale.
Shilkan ayaa u dhaxeeyay gaari nooca loo yaqaano mataatuuda iyo mid kale oo xamuul ah, saraakiil Kenyan ayaa xaqiijiyay in 7-da qof ay isla goobta ku dhinteen, dadka dhaawacmay ayaa la wariyay in loo qaaday cibistaal kuyaal ismaamulkaasi, khasaaraha dhimasho ayaa sii kordhi karo, maadaama dadka dhaawacmay ay soo gaareen dhaawacyo darran.
Dadka shacabka ah ee deggan aagga ay dhacdadu ka dhacday ayaa xirtay waddada mashquulka badan ee shilku ka dhacay, waxayna sheegayaan in dhacdooyinka shilalku faraha ka baxeen, loona baahan yahay in wax laga qabto.
About The Author
