Warbaahinta maxalliga ah ee Kenya ayaa shaacisay in ciidamo Itoobiyaan ah oo lagu soo daabulay soohdinta u dhaxaysa labada dhinac gaar ahaan aagga wabiga Nakwa ay dhibaatooyin kala duwan ku hayaan dadka Kenyaanka ah.
Xiisadda ayaa hadda ka taagan inta u dhaxayso Kibish oo ka tirsan Kenya iyo deegaanka kale ee Kangaten oo kuyaal dhanka Itoobiya, ganacsatada Kenya ee ka howlgala xuduudda ayaa sheegay in ciidamada Itoobiya ee aaggaasi la dejiyay ay xariga iyo dhac ku hayaan ganacsatada.
Waxay ganacsatadu warbaahintooda u sheegeen in ciidanka Itoobiya ay kala kulmaan caga-jugleyn joogta ah, xarig aan ka fiirsi lahayn iyo hanti shacabku leeyihiin oo si xoog ah kula wareegaan ciidamada xabashida.
Ashige Cabdi oo ah masuulka nabadaynta u qaabilsan waqooyiga Turkana iyo ismaamulka Kibish ayaa wargayska Standard, u sheegay in ciidamada gaarka ah ee Itoobiya ay kordhiyeen joogitaankooda waddada isku xirta Kibish iyo Kangaten, wuxuu sheegay inay tani meesha ka saarayso ganacsiga labada dhinac ee isaga gudba xuduudaha iyo is aaminaadda labada shacab ee Kenya iyo Itoobiya ka dhaxaysay.
Wuxuu intaas raaciyay in dhacdooyinkan halis gelinayaan dadaallada nabad-dhisidda ee ka socday xuduudda Turkana iyo Nyangatom, isagoo dhanka kale ka digay in xarigga sharci darrada ah iyo hanti la wareegida ay wadaan ciidamada Itoobiya ay wiiqayaan kalsoonida labada shacab, dhalinna karaan cadaawad iyo colaado hor leh, kuwaas oo ka qarxa agagaarka marinka wabiga Nakwa.
About The Author
