Madaxa Kooxda Villa Soomaaliya, Murtad Xasan Sheekh Maxamuud, ayaa dawladda Xabashida Itoobiya ku taageeray biyo-xireenka ay ka dhistay webiga Niil, kaas oo munaasibadda daahfurkiisu ay Talaadadii shalay ka qabsoontay isla goobta laga hir-geliyey dhaamkan oo ah degmada Guba ee gobolka Benishangul-Gumuz, oo u dhow soohdin-beenaadka ay wadaagaan dalalka Itoobiya iyo Suudaan.
Gurguurte oo shalay Kamaraduhu ay soo qabteen isagoo dhex-mushaaxaya munaasibadda xarig-ka-jarka biyo-xireenkan, ayaa goobtaasi ka jeediyey khudbad ay si weyn ugu riyaaqeen Xabashidii goobtaasi isugu timid, waxaanu dawladda Itoobiya ku bogaadiyey dhismaha dhaamkan oo si weyn ay uga soo hor-jeedaan dalalka Masar iyo Suudaan.
Ugu horeyn Murtad Gurguurte ayaa muujiyey sida uu ugu faraxsan yahay in uu ka mid noqdo dadka isugu yimid munaasibaddan, waxaanu guul ku sifeeyey mashruucan, isagoo Sharaf iyo qadarinna ku tilmaamay in laga qayb-geliyey xafladda xarig-ka-jarka dhaamkaasi ay Xabashidu samaysatay.
Gurguurte ayaa yiri “Mudane iyo marwo iyo martida mudnaanta leh-ba, Sharaf ayay ii tahay inaan maanta idinla joogo xilli shacabka gobolku ay isugu yimaaddeen arrin muhimmad guud u leh, oo ah sidaan u maamulayno ugana wada faa’iidaysanayno, innaga oo qaybsanayna khayraadka iyo barwaaqada dalalkeenna, munaasibaddani nooma aha guusha hal mashruuc oo kaliya, balse waa mas’uuliyad wada-jir ah oo aan dhammaanteen wada sidno…. Itoobiya waxay xaq u leedahay inay raadiso farxad iyo barwaaqo.”
Gebi-dhacleynta Murtad Gurguurte ayaa shalay mar kale cirka isku sii shareertay, waxaana mar kaliya baraha bulshadda ee Masaarida is-qabsaday cambaarayn loo jeedinayo Xasan Sheekh, iyagoo labo-wajiilayntan ku tilmaamay khiyaano ka dhan ah dalka Masar, xilli dawladda riddada Masar-na ay caro xooggan ka muujisay daah-furka biyo-xireenkan oo ay u aragto inuu caqabad ku yahay nolosheeda isla markaana shaacisay inay isku diyaarinayso sidii ay tallaabo ku habboon uga qaadi lahayd.
About The Author
