Ururka Shaqaalaha Duulista Hawada ee Kenya (KAWU) ayaa Talaadadii shalay soo saaray ogeysiis socon doona muddo todobo maalmood ah oo ku saabsan shaqo-joojin ay samayn doonaan, kadib khilaafyo hareeyey shaqada iyo saameyn ka dhalatay heshiisyo la joojiyay.
Tallaabadan shaqo-joojinta ah ee la qorsheeyay waxay carqaladayn kartaa haddii ay dhaqan-gasho hawlaha garoonka diyaaradaha caalamiga ah ee ugu weyn Kenya, oo ah mid ka mid ah xarumaha duulimaadyada ugu mashquulka badan qaaradda Afrika.
Moses Ndiema, oo ah Xoghayaha Guud ee KAWU, ayaa diiday inuu cayimo goorta ay shaqo-joojintu bilaaban doonto, isagoo sheegay inay bilaaban karto wakhti kasta kaddib marka uu dhammaado muddada ogeysiiska.
Hay’adda Garoomada Diyaaradaha ee Kenya (KAA) oo xiriir ay la samaysay wakaaladda wararka ee Reuters ayaa ka gaabsaday inuu faallo ka bixiyo cabashada iyo digniinta shaqa-joojinta ah ee ay soo saareen Ururka Shaqaalaha Duulista Hawada ee Kenya.
Shaqaalaha Garoonka Caalamiga ah ee Jomo Kenyatta ayaa sannad ka hor sameeyay shaqo-joojin maalin socotay, taasoo ka dhalatay walaac laga qabay qorshe lagu doonayay in garoonka looga kireeyo Adani Group, oo ah shirkad Hindi ah oo uu hoggaamiyo Gautam Adani oo ka mid ka ah maal-qabeennada ugu hantida badan qaaradda Aasiya.
Kenya ayaa ugu dambayntii baabi’isay heshiiska lasoo jeediyay kaddib markii Mareykanku uu ku eedeeyay Adani iyo toddobo kale inay laaluush dhan qiyaastii $265 milyan siiyeen saraakiil ka tirsan dowladda Hindiya, eedeymahaas oo ay Adani Group beenisay.
Xoghayaha Guud ee KAWU, Moses Ndiema, ayaa warqad ku taariikhaysan Sebteembar 23 oo ay aragtay wakaaladda wararka ee Reuters, wuxuu ku eedeeyay guddiga KAA karti-darro iyo inay ku guuldareysteen inay u dhaqmaan si waafaqsan danaha Kenya.
“Tusaalaha ugu weyn ee karti-darrada guddiga iyo sida aysan xaqiiqada ula socon waa dhacdooyinkii dhowaa ee la xiriiray heshiiska Adani iyo go’aammada kale,” ayuu yiri Ndiema, isagoon cayimin muddada ay shaqo-joojintu socon doonto.
About The Author
