Degmada Caabudwaaq ee gobolka Galgaduud ayaa markale martigelisay isku soo baxyo ka dhan ah doorashooyin gaaleedka uu wato Xassan Gurguurte iyo madaxa maamul goboleedka ashahaada la dirirka Galmudug.
Dibadbaxa maanta dhacay waxaa ka qayb-qaadanayay qaybaha kala duwan ee bulshada magaalada, kuwaasoo isugu soo baxay waddooyinka magaalada, waxaa sidoo kale isku soo baxyada dhinac socday dhoolatus ay sameeyeen maleeshiyo hubeysan oo qayb ka ah dibadbaxayaasha.
Sarkaal u hadlay maleeshiyada hubeysan ee isku soo baxa qaybta ka ahaa ayaa sheegay inay kasoo horjeedaan sanduuqyada doorasho ee ay wataan Xassan Gurguurte iyo Qoorqoor, magaalada Caabudwaaq in aan laga oggolayn ayuu sheegay doorashadaasi, isaga oo ku goodiyay inay tallaabo qaadi doonaan haddii sanduuqyada la keeno degmadaasi.
Maleeshiyadiisa ayuu dhanka kale amar ku siiyay inay weeraraan goob kasta oo lagu qorsheynayo nidaamka doorasho ee Xassan Gurguurte wato, ciidanka lagu soo bandhigay degmada Caabudwaaq ayaa ku qalabaysnaa hubka culus iyo gaadiidka nooca kuwa dagaalka ah ee ay qoryuhu ku rakibanyihiin.
Waa isku soo baxyadii labaad oo bulshada ku dhaqan degmada Caabudwaaq ay ku diidanyihiin doorashada qof iyo codka ah ee uu wato murtad Xassan Gurguurte, taasi oo uu soo qaatay madaxa maamul goboleedka ashahaada la dirirka Galmudug murtad Qoorqoor.
About The Author
