Isbedel dhanka maamulka ah ayaa ka dhacay mid kamida wadamada dhaca Koonfur bari qaaradda Afrika waxaana talada lawareegay ciidanka melleteri oo lasaftay dadkii dibad baxyada ka dhigayay.
Taliyaha cutubka gaarka ah ee ciidamada Madagascar ayaa sheegay in ciidamada wadankaasi ay la wareegeen awoodda dalka kadib markii baarlamaanku cod u qaaday xil ka qaadis madaxweynihii wadankaasi Andry Rajoelina.
Taliyahaas oo ah Korneyl Michael Randrianirina kana tirsan cutubka gaarka ah ee ciidanka ee loo yaqaan “Capsat” ayaa akhriyay bayaan uu kaga dhawaaqayay la wareegidda talada dalka isagoo hortiisa ka hadlayay dhismo dowladeed oo lagu baahiyay idaacadda afka dowladda ku hadasha.
Wuxuu intaas ku daray in ciidamadu ay kala direen dhammaan hay’adaha dowladda marka laga reebo golahabaarlamaanka kaas oo dhowr daqiiqo ka hor u codeeyay in xilka laga qaado madaxweynihii wadankaasi Rajoelina, isaga oo ku eedeeyay khiyaano iyo xilgudasho la’aan.
Rajoelina ayaa saacado ka hor intii aan la eryin soo saaray xeer lagu kala dirayo baarlamaanka, isagoo isku dayay inuu hor istaago codka xil ka qaadista isaga lagu beegsanayay xilli dalka ay ka socdaan mudaharaadyo ballaaran oo looga soo horjeedo maamulkiisa.
Dhaqdhaqaaqyada ciidanka ayaa toddobaadkan laga dareemayay magaalada caasimadda ah ee antananariifa iyadoo madaxweynihii wadankaas uu ku dhuuntay meel aan la garanayn taas oo sii wiiqay awooddiisa. Inkasta oo uu diiday inuu iscasilayo, haddana wuxuu khudbad uu toos ugu jeediyay shacabka baraha bulshada ku sheegay in uu isbedel sameynayo.
Ugu yaraan 22 qof ayaa ku dhimatay iskusoo baxyadii rabshadaha watay ee ka dhacay wadanka Madagasgar oo kamid ah wadamada ugu faqiirsan qaaradda Afrika waxaana kheyraadka wadanka jaziiradaha badan si bilaash ah ku gurta dowladda Faransiiska oo horay ugummeysan jirtay.
Maxkamadda ugu sarraysa dalka Madagasgar ayaa wixii dhacay ku sifaysay inqilaab melleteri waxayna ku baaqday in 60 maalmood gudahood lagu qabto doorashooyin cusub.
About The Author
