Wararka ka imaanaya waddanka Koonfur Africa, ayaa sheegaya in kooxo hubeysan oo burcad ah ay saaadihii lasoo dhaafay dil bareer ah u gaysteen nin ganacsade ah oo kasoo jeeda Soomaaliya.
Dilkan ayaa gelinkii dambe ee shalay ka dhacay mid ka mid ah xaafadaha degmada Philippi ee ka tirsan magaalada Cape town ee gobolka Western Cape, halkaas oo lagu weeraray nin ganacsade ah oo howlihiisa shaqo ku guda jiray.
Kooxda burcadda ayaa lasoo wariyay inay weerareen dukaan uu leeyahay nin ganacsade ah oo Soomaaliya ka tagay, kaasi oo lagu magacaabi jiray Shool Mohamed Cadde, isaga oo goobtiisa ganacsi ku sugan ayay rassaas oodda uga qaadeen, taasi oo keentay in uu geeriyoodo.
Ilo wareedyo ayaa soo sheegay in dilka kaddib ay kooxda burcadda ah si nabad-galyo ah goobta uga baxsadeen, ma jirin wax dhac ah oo ay u gaysteen ganacsadaha sida lasoo wariyay.
Ciidamo Booliis ah ayaa lasoo wariyay inay goobta tageen dilka burcaddu u gaysteen ganacsadaha kaddib, waxayna sidii caadada u ahayd goobta ka sameeyeen baaritaanno aysan wax natiijo ah kasoo bixin.
About The Author
