Khasaare kala duwan oo isugu jira mid nafeed iyo mid hantiyeed, ayaa ka dhashay shil tareen, kaasi oo saacadihii lasoo dhaafay ku rogmaday gudaha magaalada Shiniile ee xarunta gobolka Siti ee dhulka Soomaali-galbeed ee ku hoos jira gumeysiga xabashida.
Shilkan ayaa waxa uu si gaar ah uga dhacay goob tareenka laga raaco oo ku taal magaalada Shiniile sida ay soo wariyeen dad goobjoogeyaal ah, si rasmi ah looma shaacin sababta keentay shilka, balse goobjoogeyaal ayaa sheegay in tareenku ahaa mid duug ah oo sannado badan lagu shaqeynayay.
Ilo wareedyo deegaanka ah ayaa soo sheegay in shilkan ay ku dhinteen ugu yaraan 14 qof oo isugu jira shaqaale iyo dad rakaab ah oo Soomaali u badan, halka sidoo kalena ku dhaawacmeen 29 kale, wararka qaar ayaa sheegaya in dhaawacyadu intaa ka badanyihiin.
Tareenka ayaa shilka galay abbaare 8:00 fiidnimo ee xalay, wuxuuna siday dad rakaab ah iyo badeeco kala duwan, burbur xoog leh ayaana soo gaaray sida laga dheehan karo sawirro lagu faafiyay baraha bulshada.
Tareenka shilka galay ayaa kasoo baxay magaalada Dawan ee kutaal xuduud beenaadka u dhaxeeya Soomaali galbeed iyo Jabuuti, wuxuuna kusii jeeday dhanka magaalada Diridhabe, sida ay sheegeen dad goobjoogeyaal ah.
Dhulka Soomaali galbeed ee gumeysiga nooga haysato dowladda saliibiyadda xabashida Itoobiya ayaa ka mid ah gobollada ay ka dhacaan shilalka culus ee sababa khasaaraha nafeed iyo midka hantiyeed.
About The Author
