Dhacdooyin aad looga argagaxay ayaa dhawaanahan kusoo noqnoqotay dalka Ingiriiska, kadib markii maalmo gudahood hal guri laga helay laba nin oo mayd ah.
Ciidamada booliska ayaa saacadihii lasoo dhaafay gaaray guri ku yaalla magaalada Watton ee gobolka Norfolk, kadib markii halkaas lagu arkay nin mayd ah.
Waaxda gurmadka deg-degga ah oo goobtaasi gaartay ayaa xaqiijisay dhimashada ninkan oo da’diisa lagu qiyaasay 60 jir.
Saraakiisha ayaa shaacisay in ilaa hadda aanay garanayn sababta uu ninkani u geeriyooday, iyagoo intaa ku daray in weli ay wadaan oo aanay ka quusan helista natiijada baaritaanka kiiskan.
Falkan ayaan ilaa hadda dhinacna loo saarin, sida uu sheegay wargeyska The Sun, goobtuna weli waa mid u xayndaaban ciidamada booliska ee baaritaanka wada.
Booliska Norfolk waxay xaqiijiyeen in meydka nin kale oo ilaa hadda aan la ogaan sababta uuu dhintay isna laga helay isla gurigaasi, gaar ahaan Isniintii lasoo dhaafay ee 13-ka October.
Ninkan labaad, ayaa la helay waaberigii hore, waxaana goobta ku xaqiijiyey geeridiisa shaqaalaha gurmadka caafimaadka.
Labada kiis ayaa hadda si wada-jir ah loo baarayaa iyadoo boolisku ay raadinayaan xiriirka suurtagalka ah ee ka dhaxayn kara labada dhacdo, sida uu sheegay Wargeyska The Sun.
About The Author
