Wararka ka imaanaya xerada qaxootiga Xagardheer ee Dhadhaab ee dhulka muslimiintu leeyihiin ee Kenya xoogga ku haysato ayaa sheegaya in halkaasi uu ka kacay dab wayn oo khasaare baaxad leh gaystay.
Ilo wareedyo ayaa sheegay in dabka uu ka kacay aagga xaruunta shirkadda Safaricom ee Kenya ku leedahay xeradaasi, isaga oo kusii fiday suuqa xerada qaxootiga Xagardheer, waxaana uu halkaasi ka gaystay khasaare hantiyeed oo aad u badan.
Daqiiqadihii ugu horreeyay ayuu dabku si fudud ku fiday, wuxuu si deg deg ah ku gaaray xarumo ganacsi oo kuyiillay suuqa, kuwaas oo uu gabi ahaan dhulka la simay, sida laga dheehan karo sawirro lagu faafiyay baraha bulshada.
Xiriiro aanu la sameynay dadkii ku sugnaa aaggaasi waxay soo sheegeen in dadku ahaayeen kuwa naftooda kala cararayay dabka maadaama uu si xowli ah ku socday, ma jirin gurmad deg deg ah oo goobta soo gaaray, waxay taa keentay in dabku socdo muddo saacado ah, isaga oo soo gaaray saaladdii casir kaddib.
Inkastoo aan tirakoob rasmi ah la sameyn, hadddana ganacsato badan oo Soomaaliyeed ayaa ku hanti beelay dabka, dabka ayaa baabi’iyay dukaamo, makhaayado iyo xarumo caafimaad sida dadka deegaanku soo sheegeen.
Wararka hordhaca ah waxay sheegayaan in kala bar dabka maanta kacay uu baabi’iyay suuqa xerada qaxootiga Xagardheer, dadka ugu badan ee ku hanti beelayna waxay ahaayeen dadka danta yar ee ganacsiyada yar yar kulahaa suuqaasi.
Waa dabkii lixaad oo ka kaca suuqa xerada qaxootiga Xagardheer, waxay na tani qayb ka tahay dabka sida joogta ah uga kaca suuqyada Soomaaliyeed ee gaysta burburka hantiyeed ee xooggan.
About The Author
