Xilli colaadaha ka jira gudaha Itoobiya ay sii laba-laxaadsadeen ayaa wararkii ugu dambeeyey ee kasoo baxay dhinaca gobolka Amxaarada ay sheegayaan dagaallo culus oo cagta lagu mariyey ciidanka Xabashida Itoobiya.
Sida ay shaacisay jabhadda Fano, dagaallo ka dhacay galbeedka Gojjam oo ay isku haleeleen ciidamada Itoobiya iyo maleeshiyaadka Fano ayaa geystay dhimashada ugu yaraan 18 askari oo ka tirsanaa ciidanka federaalka Itoobiya, halka askar kale oo badanna lagu dhaawacay weerarkaasi.
Bayaanka ay kooxdu soo saartay ayay sidoo kale ku sheegtay in gebi ahaanba ay la wareegeen gacan-ku-heynta magaalada Durbete oo ku taalla gobolka Gojjam, kadib markii magaaladaasi ay ka fara-maroojiyeen ciidanka Xabashida Itoobiya.
Khasaaraha nafeed kasakow, waxa kale oo maleeshiyaadka amxaaradu ay dagaalkan ku qabsadeen saanad millateri oo isugu jirta hub iyo rasaas fara badan. Waxaana ka mida 20 qori oo AK47 ah, iyadoo sidoo kalena uu jiro gaari Pick-up ah oo laga gubay millateriga Itoobiya.
Hawl-galladan u dambeeyey ayaa kusoo aadaya xilli labadan bilood ee u dambeeyey khasaare culus dhabarka loo saaray ciidanka Xabashida Itoobiya ee dagaalka kaga jira gobolka Amxaarada, kuwaas oo dhegta dhiigga loo daray boqollaal askari, halka boqollaal kalena nolosha lagu qab-qabtayna ay haatan ku jiraan gacanta jabhadda Fano.
About The Author
