Xogo faahfaahsan ayaa kasoo baxaya markab ganacsi oo saacadihii lasoo dhaafay kooxo hubeysan oo Soomaali ah ay ku qabsadeen xeebaha ka fog biyaha Soomaaliya.
Markabkan ganacsi oo lagu magacaabo Hellas Aphrodite, ayaa kasoo safray dekadda Sikka ee dalka Hindiya, waxaana uu kusii jeeday dhanka magaalada Durban ee dalka Koonfur Africa, halkaasi oo uu shidaal u siday.
Wararkii ugu dambeeyay ayaa sheegaya in kooxaha Soomaalida ah ay ugu dambayn si iskood ah isaga degeen markabka ay gacanta ku dhigeen, markii ay ku fashilmeen inay afduubtaan shaqaalaha markabka la socday oo 24 qof ka kooban.
Shaqaalaha ayaa lasoo wariyay markii ay weerarka la kulmeen ee maamulka markabka uu gacantooda ka baxay, ay isku soo xireen qol difaac ah oo lagu magacaabo (citadel) oo ku dhex yiillay markabka, kooxaha Soomaalidu ah waxay isku dayeen inay jabiyaan qolkaasi, balse way ku guuldarreysteen.
Howlgal gaaleedka midowga Yurub ee Atalanta, ayaa sheegay in Soomaalidii qabsatay markabka ay si nabad ah uga degeen markabka, goobta weerarka uu ka dhacay ayuu sheegay inay gaareen ciidankooda oo markabka iyo sidoo kale shaqaalahaba gacanta ku dhigeen iyaga oo badqaba.
Midowga gaalada Yurub, ayaa sheegay in kooxaha Soomaalidu weli halis ku yihiin maraakiibta ku safraya biyaha caalamiga, maadaama ay wataan bay dhaheen doon aad u dheeraysa oo laga leeyahay Iiraan, oo ay horay weerar ugu qabsadeen.
Markabka ay kooxaha Soomaalidu ka degteen, ayaa Khamiistii lagu qabtay qiyaastii meel 1,000 Kiiloomitir ka baxsan xeebaha degmada Eyl, wakaaladda wararka ee Ap ayaana weerarkaasi ku tilmaantay kii ugu horreeyay oo kooxo Soomaali ah ku qabsadaan Markab ganacsi muddo hal sano ah, balse ku guuldarreysteen inay gacanta ku dhigaan shaqaalaha.
About The Author
