Dilalka iyo dhaca gaarka ah ee lagu hayo ganacsatada Soomaaliyeed ee ku dhaqan waddanka Koonfur Africa ayaa noqday kuwa joogto ah, waxaana ugu dambeeyay dil saacadihii lasoo dhaafay ka dhacay magaalada Cape Town.
Kooxo hubeysan oo burcad Koonfur African ah ayaa saacadihii lasoo dhaafay waxay goobtiisa ganacsi oo kutaal xaafadda Kraaifontein ee magaalada Cape Town ku dileen ganacsade Soomaaliyeed ee lagu magacaabi jiray Maxammed Nuur Cadde.
Ilo wareedyo gudaha ah ayaa soo sheegay in kooxda burcadda ah ay rassaas ku fureen ganacsadaha markii uu albaabada u furay goobtiisa ganacsi, waxay toogashadu keentay in uu geeriyoodo ganacsade Maxamed Nuur Cadde.
Kooxda burcaddu markii ay dilka gaysteen kaddib si deg deg ah ayay goobta uga baxsadeen, sida goobjoogeyaal soo sheegeen kooxdan ma aysan gaysan wax dhac ah, waxayna taasi muujinaysaa in weerarku ahaa mid gaar ah oo ay burcaddu ku beegsanayay ganacsadaha.
Maalmihii iyo bilooyinkii u dambeeyay waxaa Cape Town iyo magaalooyinka kale ee ay Soomaalidu ganacsiyada ku leeyihiin kusoo badanayay dilalka iyo dhaca sida gaarka ah loogu beegsanayo Soomaalida, ciidanka Booliiska ayaa mar walba oo dhacdo lasoo tabiya sameeya baaritaanno aysan wax natiijo ah kasoo bixin.
About The Author
