Wararka imanaya gudaha Itoobiya ayaa sheegaya askar fara badan oo ku le’atay duqayn ay diyaaradaha dagaalka ee dawladda Xabashida Itoobiya ka fuliyeen deggaan ka tirsan gobolka Amxaarada.
Ugu yaraan 40 askari oo ka tirsanaa maleeshiyaad taabacsan dawladda federaalka, ayaa la xaqiijiyey inay ku dhinteen duqayntan oo 15-kii Janaayo 2026 ka dhacday deegaanka Waghemira (Waagimiira).
Diyaaradaha fuliyey duqayntan oo noocoodu ahaa Drone, ayaa la sheegay inay si khaldan u beegsadeen xero ay ku sugnaayeen maleeshiyaad gacan-saar la leh maamulka Abiy Axmed.
Saraakiisha ciidanka ayaa goor dambe qirtay in duqeyntu ay u dhacday si khaldan, inkastoo la sheegay in diyaaraduhu ay in muddo ah dul heehaabayeen xerada ka hor intaanay weerarin.
Diyaaradaha dagaalka ee dawladda ayaa horey dad rayid ah, oo iskugu jira haween uur leh, carruur, iyo waayeel, ku xasuuqay meelo ay ka mid yihiin Waqooyiga Wollo, Bariga Gojjam, iyo Waqooyiga Shewa.
Gobolka Amxaarada ee waqooyiga Itoobiya waxaa ka socda kacdoon hubeysan oo dhiig badani ku daatay tan iyo Abriil 2023, kaas oo u dhexeeya dawladda federaalka ee Xabashida Itoobiya iyo jabhadda amxaarada ee Fano.
About The Author
