Wararka ka imaanaya dalka Jabuuti, ayaa sheegaya in Markab ay la socdeen tahriibeyaal Itoobiyaan ah uu ku degtay xeebaha dalkaasi, halkaas oo ay ku nafwaayeen ku dhawaad 10 qof.
Hay’adda socdaalka urur gaaleedka Qaramada Midoobay, ayaa xaqiijisay in dhacdada oo 24-kii Maarso ka dhacday xeeb kutaal meel u dhow magaalada Obock ee waqooyiga Jabuuti, ay ku dhinteen sagaal qof oo Itoobiyaan ah.
Waxay sidoo kale hayaddan oo magaceeda loo soo gaabiyo IOM sheegtay, in la la’yahay 45 qof oo kale oo saarnaa Markab ku degtay xeebaha waddanka Jabuuti.
Warbixintu waxay intaas ku dartay in tirada guud ee Markab degtay saarnayd ay ahayd 320 qof, kuwaas oo dhammaan kasoo jeeda dalka Itoobiya, waxay na ka mid yihiin kumannaan Afrikaan ah oo badaha isku shubay iyaga oo tahriib ah.
Haya’addu waxay dhanka kale sheegtay, in la baadigoobayo dadka weli la la’yahay, kuwaas oo aan nolol iyo geeri midna lagu haynin, halka lagu guuleystay in lasoo badbaadiyo 266 kale.
Hay’addu waxay sidoo kale sheegtay in 922 qof ay ku dhinteen ama lagu waayay waddada bari ee socdaalka tahriibeyaasha sanadkii 2025, taas oo aad uga badan tirakoob la sameeyay sannadkii ka horreeyay oo ahaa 558 qof, waxay na taas ka dhigtahay sanadkii ugu dhimashada badnaa tan iyo markii hay’ad gaaleedkan IOM billowday raadraaca socdaalka waddadan sannadkii 2014-kii.
About The Author
