Inta la hubiyay ugu yaraan laba qof oo Kenyan ah, ayaa dhintay halka 12 qof oo kalena dhaawacmeen, kaddib shil baabuur oo ka dhacay waddo mashquul badan oo kutaal dalka Kenya.
Shilka baabuur, ayaa yimid markii gaari Xamuul ah uu ku dhacay gaari kale oo nooca mataatuuda ah oo marayay nawaaxiga Kapmusa oo ku teedsan jidka wayn ee u dhaxeeya Bomet iyo Kisii.
Sarkaal ka tirsan Booliiska ismaamulka Bomet, oo magaciisa lagu sheegay Daniel Ololngojine, ayaa warbaahinta maxalliga ah u sheegay in baabuurka xamuulka ah oo kasoo baxay Kaplong kuna sii socday magaalada Bomet, uu ka baxay wadada ka hor inta uusan ku dhicin gaariga matatuuda.
Darawalka gaariga Mataatuuda ah iyo hal qof oo rakaab u ahaa ayaa lasoo wariyay inay isla goobta ku dhinteen, 7 qof oo dhaawacyo qaba ayaa shilka ka dib la geeyay cisbitaal kuyaal Kaplong, halka 4 qof oo dhaawacyo halis ah qabana loola cararay cisbitaalka Tenwek.
Shilalku waxay ka mid yihiin dhacdooyinka sida joogtada ah uga dhaca dalka Kenya, waxaana sannadkiiba la diiwaan geliyaa dhimashada iyo dhaawaca kumannaan qof, shilalka waxaa inta badan gala gaadiidka kala duwan, halka diyaaradaha ay mararka qaar shilalka qayb ka yihiin.
About The Author
