Iyadoo ay socoto saasaan colaadeed oo si weyn isu soo taraysa, ayaa maamulka Ku-meel-gaarka ah ee gobolka Tigray uu jawaab adag ka bixiyey bayaan dhowr cisho ka hor ay soo saartay Jabhadda TPLF oo lagu sheegay inay isku diyaarinayso dib ula wareegista awoodda gobolka iyo kala-dirista maamulka hadda jira ee hoos-taga nidaamka Abiy Axmed.
Madaxweynaha maamulka maqaar-saarka ah ee gobolka Tigrey, Janaraal Tadesse Worede oo shalay shir-jaraa’id ku qabtay caasimadda Maqalla, ayaa naqdiyey go’aanka TPLF, waxaanu ku tilmaamay mid halis ku ah nabadda isla markaana burburinaya heshiiskii Pretoria.
Woreda waxa kalse oo intii uu ku gudo-jiray shirkiisan jaraa’id sheegay in doorashadu tahay mid u dhaxaysa waxa uu ku sheegay “nabadda jirta” iyo “dagaal dib u qarxa”. Waxaanu carrabka ku adkeeyay in muhiimaddu tahay soo celinta barakacayaasha.
Wararka ayaa sheegaya in TPLF ay Jeneraal Tadesse hor-dhigtay saddex doorasho oo kala ah, inuu ku biiro halgankooda, inuu dalka isaga baxo, ama inuu wajaho tallaabo adag oo millatari. Balse Tadesse wuxuu wacad ku maray inuusan gobolka ka bixi doonin.
Mas’uuliyiin ay ka mid yihiin madaxii hore ee Tigrey Getachew Reda oo xiriir dhow la leh Abiy iyo qaar ka mida xisbiyada siyaasadda ee gobolka ayaa ka digay in xaaladdu ay u xuub-siiban karto iska hor-imaad hubaysan, iyagoo ugu baaqay waxa loogu yeero beesha caalamka inay soo dhex-gasho.
Ilaa hadda dawladda federaalka Itoobiya kama soo saarin wax jawaab ah oo ku saabsan xiisadahan kusii xoogaysanaya gobolka Tigray, oo laga cabsi qabo inuu dib ugu laabto dagaal haddii aan xal deg-deg ah laga gaarin khilaafka xooggan ee u dhexeeya TPLF iyo maamulka hadda jira.
Maalmo ka hor ayay ahayd markii TPLF ay ku dhawaaqday inay doonayso in dib ay u soo celiso xaaladdii uu gobolka Tigrey ku sugnaa wixii ka horreeyey dagaalkii labada sano socday, ee ee 2020-kii ka qarxay deggaannadaasi, taas oo lagu fasiray in ay rabaan ku dhawaaqista maamul gooni-goosad ah.
About The Author
