Wasiirka Caafimaadka Faransiiska haweenayda lagu magacaabo Stéphanie Rist ayaa maanta oo Isniin ah si rasmiya ugu dhawaaqday in cudurka halista ah ee hantavirus laga helay gudaha waddanka Faransiiska.
Waxay sheegtay in kiiskan si gaar ah looga helay haweenay u dhalatay Faransiiska kana mid ahayd rakaabka markab dalxiis oo cudukani uu dhawaan ka dillaacay, kaas oo kasoo shiraacday Argentina kuna sii jeeday Jamhuuriyadda Cape Verde.
Haweeneyda laga helay cudurkan ayaa ka mid ahayd shan rakaab Faransiis ah oo laga soo daad-gureeyey markabkii uu fayrasku ku faafay, kuwaas oo lagu geliyey karantiil magaalada Paris ee caasimadda Faransiiska.
Sida ay wasiiraddu u sheegtay idaacadda France Inter, haweenaydan laga helay cudurka ayaa aad u xanuunsatay habeennimadii Isniinta ee xalay, iyadoo baaritaanno lagu sameeyey ugu dambayn lagu xaqiijiyey jiritaanka xanuunkan.
Waxa kale oo xustay in afarta ruux ee kale ee weli ku jira Kantiilka laga helay natiijooyin taban, balse tijaabo kale lagu celin doono. Iyadoo saraakiisha caafimaadku ay sheegeen in ilaa hadda gudaha Faransiiska la aqoonsaday 22 xaaladood oo xiriir la leh Hantavirus.
Hawlgal dib loogu soo celinayo rakaabka saaran markabka dalxiiska ee cudurkani faafitaanka cudurkani uu ka dillaacay ayaa weli socda, iyadoo saraakiisha Mareykanka ay shalay Axaddii sheegeen in qof Mareykan ah laga helay fayraskan.
Saddex rakaab ah oo saarnaa markabka MV Hondius, ayaa ku naf-waayay xanuunkan, kuwaas oo kala ahaa lamaane u dhashay dalka Netherlands iyo sidoo kale haweeney u dhalatay waddanka Jarmalka, halka kuwo kalena uu soo ritay.
Axaddii shalay waxaa hawl-galkan lagu daad-gureeyey 94 qof oo ka mid ahaa rakaabkii saarnaa markabkan, kuwaas oo dib loogu celiyey 19 dal oo ay ka kala socdeen, sida ay ku dhawaaqday Wasiirka Caafimaadka Spain Mónica García oo ku sugnayd Tenerife oo ka tirsan jasiiradaha Canary ee dalka Spain.
Saraakiisha Spain ayaa sheegay in markabkan ay saarnaayeen ku dhowaad 150 rakaab iyo shaqaale ah, kuwaas oo ka kala yimid 23 dal, ayna daadgureyntoodu sii socon doonto, iyadoo la filayo in duullimaadyada ugu dambeeya galabnimada Isniinta lagu celin doono Australia iyo Netherlands.
Ururka la baxay Caafimaadka Adduunka WHO ayaa ku taliyay in dadkan lagas oo dejiyey markabka la saaro karantiil soconaya 42 maalmood iyo dabagal joogto ah. Dalalka sida Faransiiska, Spain, Giriigga, iyo Ingiriiska ayaa durba bilaabay karantiilka rakaabka soo laabtay.
Markabku wuxuu 1-dii April ka soo kicitimay magaalada Ushuaia. In kasta oo mas’uuliyiinta Argentina ay shaki geliyeen in fayraska halkaas laga qaaday, balse WHO ayaa aaminsan in qofkii ugu horreeyay uu qaaday fayraska ka hor intaan safarku bilaaban, ka dibna uu dhex-qaaday dadkii saarnaa markabka.
Hantavirus waa cudur ku dhaca kuna faafa jiirka, waxaana la sheegay in badanaa bani’aademka ugu gudbo habka neefsashada walxo hawada ku jira oo ka yimaadda saxarada jiirka ee qallashay. Isagoo keeni karaa qandho, daal, iyo dhibaatooyin culus oo ku dhaca sambabada ama kalyaha.
In kasta oo fayraskani uusan lahayn tallaal ama daaweyn gaar ah, khubarada caafimaadku waxay sheegeen in khatarta uu ku hayo caafimaadka guud ee caalamka ay tahay mid hooseysa, iyagoo hoos u dhigay isbarbardhigga lala samaynayo masiibadii Covid-19.
About The Author
