Warar dheeraad ah ayaa kasoo baxaysa dagaaladii cuslaa ee maana ka kala dhacay magaalooyinka Guriceel iyo Dhuusomareeb oo ka wada tirsan gobolka Galgaduud ee bartamaha Soomaaliya.
Dagaaladan oo dhex maray Dowladda Federaalka iyo kooxaha Suufiyada ayaa waxaa ka dhashay khasaare isugu jira dhimasho iyo dhaawac.
Magaalada Dhuusomareeb waxaa ku dhintay 5 askari oo ka tirsan labada dhinac ee uu dagaalku dhex maray halka guriceel ay ku dhinteen ugu yaraan labo askari.
Xarumaha ciidanka ee labada magaalo sida saldhigyada Booliska ayaa ahaa kuwa marba qolo laga eryanayay waxaana xusid mudan in dadka DF laga dilay uu ugu caansan yahay taliyihii ciidanka ilaada Madaxtooyada Qoorqoor.
Taliyahan oo la oran jiray Cabdi Yare ayaa kamid ahaa saraakiisha Nabad Sugidda ee Muqdisho ka hawl gali jiray hase ahaatee mar dhow ayaa la geeyay Dhuusomareeb.
Galabta waxaa Dhuusomareeb gaartay diyaarad ay DF, ka dirtay magaalada Muqdisho, taasoo qaaday meydad iyo dhaawacyo.
Isbitalka weyn ee magaalada Dhuusomareeb ayaa ahaa mid aanan dhaac la geyn karin, sababtoo ay wadada weyn ee soo gasha ayaa ahayd mid ay labada ciidan isku hor fadhiyeen.
Arrintan ayaa saamayn ku yeelatay dadka shacabka ah ee ay wax yeelladu kasoo gaartay dagaalka. Goob joogayaal ayaa inoo sheegay in ay wali dhiillo ka taagan tahay Dhuusomareeb iyo Guriceel.
Dagaalada maanta ka dhacay labada magaalo ayaa ahaa kuwa aad u culus iyadoo bulshada dhexdeeda la isugu adeegsaday hubka lidka diyaaradaha, garneylada garbaha iyo madaafiic Hoobiye u badan.
Labada dhinac ee dagaalamay wuxuu mid kasta sheeganayaa in laga gar daran yahay oo dhibaato loo geystay.
Dagaalada ayaa sababay iney barakacaan qaar kamid ah dadka shacabka, lamana oga halka ay ku dambeyn kareyso colaaddan oo soo billaabatay tan iyo markii ay doorashadu ka dhacday magaalo madaxda gobolka.
About The Author
