Maleeshiyaadka dowladda Federaalka ee dhowaan ciidamada shisheeye ay geeyeen degmada Janaale ee Sh/hoose ayaa bilaabay in ay tacadiyo daran ugeystaan dumarka muslimaadka ah ee ku dhaqan gudaha degmada iyo hareeraheeda.
Wararka ka imaanaya Sh/hoose ayaa sheegaya in maleeshiyaadka dowladda ay degmada Janaale ku kufsadeen sedax gabdhood oo kamid ahaa dadka degan hareeraha degmada, Xasan Cumar Macallim oo horay usoo noqday guddoomiyaha degmada Marka islamarkaana katirsan saraakiisha maamulka dowladda ee gobolka ayaa dhacdadan xaqiijiyay.
Isagoo wareysi siinayay telefeshinka maxalli ah ayuu sheegay in ciidamada melleteriga ay kufsadeen gabdho caano u iibgeeyay janaale kadibna ciidamadii xadgudubka geystay gacanta lagu dhigay.
Mas’uulkan katirsan maamulka Sh/Hoose ayaa intaas ku daraya in dumarka lagu xadgudubay mid kamida oo xaaladeeda caafimaad ay liidato ladhigay isbitaalka magaalada Marka markii xaaladooda wax laga qaba waayayna loo gudbiyay dhanka Muqdisho, guddoomiyaha gobolka ayuu ku eedeeyay in uu ka gaabiyay la xisaabtanka ciidamada kufsiga ugeysanaya dumarka.
“Askar ka tirsan ciidankii Janaale qabsaday waxay meel uga dhaceen sharafta ciidanka waxayna kufsadeen dumar ay ku jirto Gabar 13 sano jir ah” sidaas waxaa yiri Xasan Cumar Macallim.
Dumarka lakufsaday waxaa kamid ah gabar 13 sana jir ah iyo haweenay xaamilo ah, dhacdadan waxaa aad uga xumaaday dadka deegaanka oo ku baaqayn in falkan laga dhiidhiyo.
Degmada Janaale ayaa gacanta ciidamada AMISOM iyo maleeshiyaadka dowladda ku dhacday bishii Maarso ee lasoo dhaafay wixii xilligaas ka dambeeyay ayay bulshada deegaanka lakulmayeen xadgudubyo dhan walba ah oo uga imaanaya ciidamada huwanta ah gaar ahaan kuwa dowladda.
Maleeshiyaadka dowladda qeybahooda kala duwan ayaa horor ku ah dumarka Soomaaliyeed, magaalo gacanta ciidamada shisheeye iyo kuwa dowladda gashay oo aan kiisaas kufsi ah lagasoo calaamadayn majirto.
About The Author
