Ciidamada melleteriga dowladda Xabashida Itoobiya ayaa bilaabay duullaan ballaaran oo ka dhan ah ismaamulka gobolka Tigray ee dhaca waqooyiga wadankaasi.
Amar kasoo baxay Abiy Axmed ayuu ku wargeliyay qeybaha kala duwan ee ciidamada dowladda Itoobiya in ay qaadaan howlgal melleteri oo ay ku beegsanayeen dhammaan magaalooyinka ismaamulka Tigreega.
Wararka ka imaanaya Itoobiya ayaa sheegaya in duqeymo xagga cirka ah ay ku socdaan magaalada Maqalla ee caasimadda u ah Tigray iyo dhowr saldhig oo ay ku sugnaayeen ciidamada ismaamulka.
Dowladda Xabashida Itoobiya ayaa jartay dhammaan isgaarsiintii gobolka sida taleefanada iyo Internetka waxaana socda dagaal culus, Abiy Axmed wuxuu sheegay in siyaasiyiinta gobolka Tigray ay ka tallaabeen khadka cas ayna isku diyaariyeen hanaan gooni ugoosad ah.
Waxaa fashilmay dhammaan isku dayadii lagu doonayay in xal siyaasadeed looga gaaro xiisadda colaadeed ee labada dhinac ka dhax aloosan, madaxda TPLF ayaa ku eedaynaya Abiy Axmed daandaansi iyo xagal daacin ka dhan ah shacabka qowmiyadda Tigrayga.
About The Author
