Wararka ka imaanaya wadanka Itoobiya ayaa sheegaya in qaraxyo xooggan ka dhaceen labada magaalo ee ugu waaweyn dhulka ay degto qowmiyadda Amxaarada.
Ugu yaraan laba qarax ayaa ka dhacay magaalooyinka Gonder iyo BaharDar oo dhaca waqooyi galbeed dalka Itoobiya, war rasmi ah oo kasoo baxay ismaamulka Amxaarada ayaa lagu sheegay in hal qarax uu ka dhacay magaalada Gonder halka qaraxa labaad ee uu ruxay BaharDar.
Qoraallo lagu baahiyay baraha bulshada ayaa lagu sheegay in qaraxa ka dhacay Gonder lagu beegsaday meel ku dhow saldhigga melleteri ee laga hagayo duullaanka ciidanka Itoobiya ay ku qaadeen gobalka Tigray.
Arbacadii lasoo dhaafay ayay aheyd markii qarax uu hal qof ku dhaawacmay uu ka dhacay magaalada caasimadda ah ee Addis Ababa, xukuumadda Abiy ayaa weeraradan qaraxyada ah ku eedaynaysa mas’uuliyiinta Jabhadda TPLF.
Dhanka kale dowladda Xabashida Itoobiya oo cadaadis melleteri kala kulmaysa Jabhadda TPLF ayaa bilaawday in ay labaxdo qaar kamid ah ciidamadeeda xoogga ku haysta dalka Soomaaliya.
Saacadihii lasoo dhaafay ayaa boqolaal Askari Xabashi ah laga daad gureeyay gobollo dhaca Koonfurta iyo bartamaha dalka Soomaaliya.
Shabakadda Bloomberg oo soo xiganaysa ilo xog ogaal ah ayaa sheegtay in dowladda Itoobiya ay sedax kun oo kamid ah ciidamadeeda ay kala baxday Soomaaliya kuwaas oo aan kamid aheyn howlgalka AMISOM.
Ciidamadan ayaa loo daad gureeyay dhanka ismaamulka Tigray halkaas oo uu ka socdo dagaal isbuucii sedaxaad madaxa lasii gelaya, ilo wareedyo waxay sheegayaan in diyaarado xamuul ah ay ciidamo Itoobiyaan ah ka daabuleen gobollo ay kamid yihiin Hiiraan iyo Baay.
Kumanaan askari Itoobiyaan ah ayaa muddo sanada ah xoog ku haysta magaalooyin katirsan Soomaaliya, sanaddii 2016 markii ay kacdoonnada shacbiga ah gilgilayeen Itoobiya ayay sidaan oo kale ciidamo ugala baxday dalka waxaana gacanta muslimiinta dib ugusoo laabtay magaalooyin ay kamid yihiin Galcad,Moqokori iyo Tayeegloow.
About The Author
