Wararka ka imaanaya magaalada Halgan ee gobolka Hiiraan ayaa sheegaya in saaka dagaal uu halkaas ku dhexmaray ciidamo kawada tirsan milatariga Itoobiya.
Dagaalka ayaa qarxay abaara 6:30 subaxnimo kadib markii ciidamada Itoobiyaanka ay isku dayeen in ay hubka ka dhigaan qaar ka tirsan askarta xerada ku sugan kuwaas oo amar diido sameeyay kadib dagaal ka bilaabay xerada gudaheeda.
Rasaas culus ayaa in muddo ah ka socotay gudaha xerada ciidamada Itoobiyaanka ah ee magaalada Halgan, waxaana lasoo sheegayaa in halkaas uu ka dhashay khasaare iskugu jira dhimasho iyo dhaawac.
Mid ka mid ah dadka deegaanka waxa uu xaqiijiyay in Labo askari oo Itoobiyaan ah ay ku dhinteen dagaalka saaka Xabashida Itoobiya ku dhexmaray degmada Halgan, Waxeyna warar hoose sheegayaan in khasaaraha uu intaas ka badan yahay ayna jiraan askar Itoobiyaan ah oo dhimasho iyo dhaawac ku noqday dagaalkaas.
Dawladda Itoobiya ee uu hogaamiyo Abey Axmad ayaa tan iyo markii uu bilawday dagaalka ka dhanka ah maamulka Tigreega waxay bilawday ugaarsi ay ku hayso saraakiisha iyo ciidamada Itoobiyaanka ee kasoo jeeda qawmiyada Tigreega ah.
Boqolaal saraakiil iyo askar Tigree ah oo ku sugan gudaha Soomaaliya ayaa xilalkii iyo hubkii laga qaaday kuwaas oo uu badankood lagu dhex xiray saldhigyada ciidamada halka qaar kalena loo qaaday xabsiyo ku yaalla gudaha Itoobiya.
About The Author
