Warar dheeraad ah ayaa kasoo baxaya dagaal culus oo markale ka dhacay deegaan katirsan gobolka Mudug ee dhaca bartamaha dalka Soomaaliya.
Ciidamo aad u hubaysan oo ka tirsan Mujaahidiinta ayaa xalay weerar gaadmo ah ku qaaday tuulada Jiic dheer oo qiyaastii 18KM ujirta deegaanka Bacaadweyne.
Dagaal culus ayaa gudaha tuulada ku dhaxmaray ciidamada guutada 21aad ee DF-ka iyo dagaalyahannada Al Shabaab, ilo wareedyo ayaa sheegaya in iska hor’imaadka kadib ay jihaadiyiintu si buuxda ula wareegeen gacan ku heynta Jiic dheer.
Ugu yaraan 5 askari ayaa la xaqiijiyay in lagu dilay weerarka halka tira kale ay dhaawacyo soo gaareen, ciidamo watay laba gaari Tikniko ah oo gurmad ahaan uga baxay Bacaadweyne ayaa lakulmay weerar dhabbagal ah.
Iska hor’imaadyo soo noq noqday ayaa bilihii lasoo dhaafay Koonfurta gobolka Mudug ku dhaxmarayay ciidamada dowladda iyo dagaalyahannada Al Shabaab.
About The Author
