Maamulka ashahaado-la-dirirka ah ee la baxay Somaliland ayaa wajahaya weerarro culus oo dhinaca internet-ka ah kadib markii saacadihii lasoo dhaafay loo dhacay qaar ka mida mareegaha ay barta Internet-ka ku leeyihiin hey’adaha kala duwan ee maamulka Hargeysa.
Burcad dhinaca Internet-ka ah oo loo badinayo inay xiriir ay la leeyihiin dowladda Iiran iyo kooxda Xuutiyiinta Yemen ayaa jabsatay shabakadda rasmiga ah ee Wasaaradda Arrimaha Dibadda Somaliland. Iyaga oo bogga hore ee mareegtaasi ku baahiyey sawirrada qaar ka mida hoggaanka Xuutiyiinta.
Sidoo kale, kooxdani waxay mar kale jabsadeen isla markaana ay la wareegeen bogga rasmiga ah ee Baanka Dhexe ee maamulka Somaliland, iyagoo shabakaddaasina ku baahiyey farriimo taageero loogu muujinayo kooxda shiicadaha ah ee Xuutiyiinta Yemen.
Website-yada la jabsaday ayaa laga tirtiray dhammaan xogtii iyo macluumaadkii ku kaydsanaaa, iyadoo saraakiisha sawirradooda lagu baahiyey uu ka mid ahaa afhayeenka Xuutiyiinta, ninka lagu magacaabo Yaxye Sariic.
Sidoo kale bogagga hore ee shabakadahan lala wareegay, ayaa lagu xardhay magaca kooxda sheeganaysa inay fulisay weerarkan, kuwaas oo astaantoodu muujinayso inay yihiin isla kooxdii jabsatay markii uu socday dagaalka Iiraan, kaamirooyinka waddooyinka Talaabiib iyo qaar kale oo ka mida magaalooyinka waaweyn ee ku hoos-jira gumaysiga Yahuudda.
Kooxdan oo magaca ay wadataa uu yahay Cyber Islamic Resistance ayaa sidoo kale jabsatay xogta wasaaradda difaaca iyo xogta cisbitaallada ee maamulka Yahuudda. Iyaga oo sidoo kalena jabsaday telefoonnada qaar ka mid ah saraakiisha sare ee Sahaayinada.
Ilaa hadda dhacdadan kama uusan hadal maamulka Somaliland, sidoo kalena weli ma jirto cid si rasmi ah u sheegatay fulinta weerarradan, kuwaas oo lasoo weriyey inay socdeen muddo 24 saac ah, iyadoo wararka qaarna ay tibaaxayaan in hawl-galkani uu saameeyey xarumo kale oo hey’adeed.
Dhacdadan ayaa kusoo aadaya xilli usbuucii dambeeyey Xuutiyiintu ay soo saareen hanjabaado ka dhan ah maamulka ashahaado-la-dirirka Somalilland kadib markii Cirro iyo Netanyahu ay dhawaan kala saxiixdeen heshiisyo xaaraan ah oo maamulka Yahuudda loogu gacan-gelinayo qaybo ka mida gobollada dhaca Waqooyi Galbeed Soomaaliya.
About The Author
