R/Wasaarihii hore ee kooxda riddada Soomaaliya Xasan Cali Khayrre oo habeennimadii xalay ka hadlay magaalada Muqdisho ayaa eedaymo culus u jeediyey kooxda Villa Soomaaliya ee hor-joogaha uu ka yahay murtad Xasan Sheekh Maxamuud.
Wuxuu sheegay in 66 sano ka bacdi khatar weyn ay wajahayso ummadda Soomaaliyeed isla markaana dhaawacyada ugu culus ay gaareen afartii sano ee lasoo dhaafay ee hoggaanka riddada uu hayey Xasan Sheekh Maxamuud.
Isla muddadaasi ayuu sheegay in Gurguurte uu ku hawllanaa kala qaybinta iyo kala qoqobka ummadda Soomaaliyeed. Waxa kale oo uu ka dhawaajiyey in duullaano gardarro ah uu ku qaaday deggaannada Jubbaland iyo Koonfur Galbeed, haatanna uu ku wajahan yahay Puntland.
Xasan Cali Khayrre waxa uu walaac xooggan ka muujiyey sida loo kala geeyey ummadda Soomaaliyeed isla markaana loo xoojiyey qabyaaladda iyo isku-dirka beellaha. Isagoo carrabka ku dhuftay dagaallo sokeeyo oo dib uga soo cusboonaaday dalka.
Murtadkani waxa kale oo uu Gurguurte ku eedeeyey inuu ciidanka iyo hubka dowladda u adeegsanayo weerarka hoggaankii hore ee kooxda riddada iyo caburinta qof kasta oo ka hor yimaadda rabitaankiisa siyaasadeed ee gurracan, arrintaas oo uu ku tilmaamay masiibo qaran.
Xasan Cali Khayrre, waxa uu wax laga xumaado ku tilmaamay xaaladda halista ah ee ay maanta wajahayso Soomaaliya, isagoo tilmaamay dhibaatooyinka ka dhasahay, gummaadka, boobka, burburinta, barakicinta, iyo afduubka uu Xasan Sheekh ku hayo shacabka Soomaaliyeed.
Khilaafka daba-dhilifyada Soomaailya ayaa muddooyinkan dambe sii laba-laxaadsaday kadib markii Gurguurte uu wax-ka-beddel ku sameeyey dastuur-gaalleedkii ay horey ugu heshiiyeen, isla markaana muddo-xileedkiisa oo dhammaaday bil iyo bar ka hor uu ku darsaday wakhti dheeraad ah.
About The Author
