Waxaa faraha kasii baxay shilalka gaadiidka ee ka dhacaya waddooyinka aadka u mashquulka badan ee dalka Kenya, halkaas oo labadii toddobaad ee u dambeeyay laga diiwaan geliyay dhimashada 140 xubnood oo Kenyaan ah, kuwaas oo ku nafwaayay shilalka gaadiidka.
Hay’adda badqabka gaadiidka ee dowladda Kenya ee magaceeda loo soo gaabiyo NTSA ayaa warbixin sannad leh oo ay soo saartay ku sheegtay in labadii toddobaad ee lasoo dhaafay shilal gaadiid oo ka dhacay dalkaasi ay ku dhinteen 140 xubnood, waxay sidoo kale sheegtay in tan iyo billowgii sannadkan la diiwaan geliyay geerida 4.139 xubnood oo ku nafwaayay shilalka baabuur.
Tirakoobkan ayay hayaddu sheegtay in la sameeyay intii u dhaxaysay January 2023 ilaa bishan aan ku guda jirno ee December, hoos u dhac aan sidaas u buurnayn ayay hayaddu sheegtay inuu jiro marka la eego khasaaraha dhimasho ee sannadkan iyo midkii ka horreeyay, tirakoobka sannadkii hore ayaa ahaa dhimashada 4,517, hoos u dhaca ayaana ka dhigan 8.4%.
Badi dadka ku nafwaayay shilalka gaadiidka ee ka dhaca dalka Kenya ayaa ah dadka lugtooda maala ee waddooyinka mara, dadka isticmaalaa baaskiilada iyo mootooyinka, sida ku xusan warbixinta ay soo saartay hayadda gaadiidka u qaabilsan dowladda Kenya ee magaceeda loo soo gaabiyo NTSA.
About The Author
