Inta la xaqiijiyay ugu yaraan 4 xubnood oo isugu jiray saddex wiil iyo adeerkood ayaa ku dhintay, halka lix kalena ay dhaawacmeen, kaddib shil xooggan oo saacadihii lasoo dhaafay ka dhacay qaybo ka mid ah gobolka waqooyi galbeed ee Soomaaliya.
Shilkan oo ahaa mid u dhaxeeyay laba gaari oo kala ah Dhayne iyo Land cruiser, ayaa ka dhacay waddada deegaanka Sallaxley ee aadda dhanka deegaanka Banka Qool-cadey, shilkaasi ayaana yimid kaddib markii ay isku dhaceen labadaasi gaari.
Dadka ku dhaawacmay shilkan ka dhacay gobolka waooyi galbeed ee Soomaaliya ayaa lasoo wariyay in loo qaaday xarumaha caafimaadka, si loola tacaalo xaaladdooda caafimaad.
Shilkan gaari ayaa kusoo beegmaya, xilli shil kale oo kan la mid ah oo saacadihii lasoo dhaafay ka dhacay degmada Qabri-dahar ee xarunta gobolka Qorraxay ee dhulka Soomaali galbeed, ay ku dhinteen laba gabdhood, sidoo kalena uu ku dhaawacmay qof kale oo rag ah.
About The Author
