Warar dheeraad ah ayaa kasoo baxaya qarax aad u xooggan oo maanta askar iyo saraakiil katirsan dowladda Federaalka lagula beegsaday deegaan dhaca bartamaha Soomaaliya.
Wararka ka imaanaya duleedka degmada Wisil ee gobolka Mudug ayaa sheegaya in qarax xooggan tuulada Xoosh lagula beegsaday kolonyo gaadiid ah oo gelbinayay Jeneraal Biixi taliyaha ciidanka lugta dowladda iyo wasiirka amniga Galmudug.
Qaraxa ayaa haleelay gaari uu saarnaa Gaashaanlle Sare Dayib Cusmaan oo ahaa Xoghayaha Jeneraal Biixi waxaana ku dhintay sarkaal iyo 4 askari oo ilaala u ahaa.
Ilo wareedyo ayaa xaqiijinaya in Jeneraal Biixi uu si dirqi ah ku badbaaday balse waxaa dhintay askar iyo sarkaal, goob joogayaal ku sugan Mudug ayaa sheegay in qaraxa oo ka dhashay Miino dhulka lagu aasay jugtiisa laga maqlay inta udhaxaysa Wisil iyo Bacaadweyne.
Xarakada Al Shabaab ayaa sheegatay mas’uuliyadda qaraxan mas’uuliyiinta lagu beegsaday sida ay baahisay Idaacadda Islaamiga Andalus.
Maleeshiyaad ashaamud ah oo Mareykanku tababaray ayna dhanka cirka ka taageerayaan diyaarado Drone ah ayaa bishii lasoo dhaafay dhaq dhaqaaq ka sameeyay deegaanno dhaca Koonfurta Mudug halkaas oo ay iska caabin adag ku wajahayaan.
About The Author
