Madaxweynaha dowladda Federaalka ayaa ku fashilmay isku day uu ku doonayay in ay kula wareego xafiiska R/wasaare Rooble saacado kadib uu soo saaray awaamir isburinaysa.
Rooble iyo golihiisa wasiirrada ayay usuurtagashay in ay dib ugu laabtaan xaafiiskooda halkaas oo ay warbaahinta kula hadleen.
R/wasaarihii lacasilay ayaa si kulul udhaleeceeyay tallaabadii uu Farmaajo qaaday wuxuuna ku tilmaamay afgambi fashilmay, Rooble ayaa ku eedeeyay saaxiibkiisi hore in uu damacsanyahay boob doorasho isagoo adeegsanaya xeelad walba.
“Tallaabooyinka uu qaaday Madaxweynihii hore Maxamed C/llaahi Farmaajo ay yihiin isku day bareer ah oo lagu afgambinayo dowladnimada, dastuurka iyo sharciyadda dalka u yaallo” ayuu yiri Rooble.
Dhammaan taliyaasha ciidamada DF-ka ayuu amray in ay ka amar qaataan xafiiska R/wasaaraha isagoo ugu hanjabay askartii iyo saraakiishii diida in tallaab laga qaadi doono.
“Waxaan farayaa Ciidamada Qalabka sida in ay si toos ah ugu amar qaataan Xukuumadda, cid kasta oo ka hor timaada amarkaan waxaan si degdeg ah ula tiigsan doonaa sharciga” ayuu markale yiri Rooble.
Wararkii ugu dambeeyay ayaa sheegaya in kumanaan maleeshiyaad ah oo kala taabacsan dhinacyada is khilaafsan ay kusii qulqulayaan aagga madaxtooyada.
About The Author
