Maleeshiyaadka jabhada mucaaradka ee ku kacsan dowladda Itoobiya ayaa weeraro culus ku haya ciidanka millatariga xabashida, iyagoo ku dhawaad 20 askari oo ka tirsan ciidamada xukuumadda Abiy Axmed ku dilay dagaallo culus oo saacadihii lasoo dhaafay ka dhacay waqooyiga Itoobiya.
Warbaahinta ku hadasha afka Axmaarada ayaa sheegtay in inka badan 17 askari oo ka tirsanaa ciidamada Itoobiya ay jabhadda Fano ku dileen dagaallo culus oo ka dhacay deegaanka Injibara ee ka tirsan Gojjam, xilli gobolkan ay ka socdaan dagaallada ugu xooggan ee dhexmaraya millatariga iyo jabhadda Axmaarada.
Dhowaan ayay ahayd markii jabhadda Fano ay sheegatay inay millatariga dowladda uu ra’iisul wasaaraha ka yahay Abiy kala wareegtay magaalo lagu magacaabo Mendida oo ka tirsan Shewa, kaddib markii ay halkaasi ka eryadeen ciidamo daacad u ah xukuumadda Addis ababa, waxaa qabashada magaaladaasi kasii horreeyay magaalo kale oo lagu magacaabo Adet Gojjam oo ah magaalo wax ka yar 40km u jirta caasimada gobolka Axmaarada ee BaharDar, halkaas oo ay jabhadda Fano ku dileen inka badan 40 ka tirsan ciidamada Abiy Axmed.
About The Author
