Xoogagga la magac baxay Dimuqraadiyiinta Suuriya ee Kurdiyiinta ah ayaa maanta sheegay in tiro ka mid ah ciidamadooda lagu dilay weerar dhanka cirka ah oo loo adeegsaday diyaaradaha aan duuliyaha lahayn ee Drones-ka, kaas oo beegsaday saldhig Maraykanka ku leeyahay baadiyaha Dayru Zuur ee bariga Suuriya.
Afhayeen u hadlay ciidamada Kurdiyiinta ee xiriirka la leh Maraykanka oo magaciisa lagu sheegay Farhad Al-Shami, ayaa qoraal uu soo dhigay bartiisa gaarka ah ee X ku sheegay in diyaarad aan duuliyaha lahayn ay ku qaraxday goob shidaalka hodan ku ah oo xero tabobar u ahayd ciidamadiisa gaarka ah.
Weerarkan oo ka dhacay saldhigga kaydka shidaalka ciidamada Maraykanka ee Al-cumar, ayuu sheegay in lagu dilay 6 askari oo ka tirsanaa ciidamada gaarka ah, ilo maxalli ah ayaadhanka kale sheegay in diyaaradda aan duuliyaha lahayn ay ka timid dhanka deegaan ay ku sugan yihiin kooxaha xulafada la ah Iran oo si joogta ah u weeraro saldhigyada ciidamada Maraykanka
Kooxaha taabacsan Iiraan ayaa sheegtay masuuliyaddan weerarkan, waxaana maalmihii u dambeeyay aad u xoogeysanayay weerarada ka dhanka ah ciidanka Maraykanka iyo xulafadiisa ku sugan Suuriya iyo Ciraaq.
About The Author
