Saraakiil ciidan oo ka kala tirsan ciidanka difaaca Kenya ee loo yaqaan (KDF)-ta iyo kuwa booliska ayaa saacadihii lasoo dhaafay ku dagaallamay qaybo ka mid ah magaalada Mombasa ee gobolka xeebta ah ee Kenya.
Wargayska “the Star” ee kasoo baxa dalkaasi oo soo xiganaya ilo wareedyo ciidan, ayaa sheegay in saraakiil ka tirsan ciidanka millatariga Kenya ee KDF ay weerar ku qaadeen saraakiil kale oo ka tirsan Booliska Kenya oo ku sugnaa kanaalka Likoni ee magaalada Mombasa.
Muuqaal uu helay wargeyska, ayaa muujinayay sarkaal ka tirsan ciidanka KDF oo dharbaaxaya askar ilaalo ah, kadibna kusii dhaqaaqaya dhanka sarkaal sare oo ka tirsan Booliska Kenya, kaasi oo isku dayay in uu soo dhex galo dagaalka, waxaana sarkaalka booliska la socday saaxiibadiis oo hubeysnaa.
Sarkaalka ka tirsan ciidanka KDF, ayaa ku baxay oo weeraray sarkaalka kale ee ka tirsan Booliska, waxaana dagaalka markii dambe ku biiray saraakiil kale oo ka tirsan booliska Kenya oo la socday sarkaalka weerarka la kulmay, sida uu wargaysku sheegay.
Ilo wareedyo goobta ku sugan ayaa warbaahinta maxalliga ah u xaqiijiyay in goobta uu weerarka ku dhexmaray saraakiisha millatariga iyo kuwa Booliska Kenya laga qaaday dhaawacyada laba askari oo boolis ah.
Wargayska The Star ayaa sheegay in saraakiisha difaaca Kenya ee KDF-ta loo yaqaan ay ku sii jeeday saldhigga ciidamada badda ee Mtongwe markii uu iska hor’imaadku dhacayay.
Taliska KDF ayaa bayaan kasoo saaray gacan ka hadalka dhexmaray ciidanka millatariga iyo kuwa booliska. kaddib markii uu faafay muuqaalka, waxay KDF sheegeen inay billaabeen baaritaannada dhacdada, waana dhacdadii 2-aad oo isku dhac ah oo bishan gudaheeda laga soo tabiyo Kenya, kuwaas oo dhexmara ciidanka booliska iyo kuwa millatariga Kenya.
Laba toddobaad ka hor, Booliska Kenya ee ka howlgala saldhigga magaalada Lodwar ayaa xabsiga u taxaabay askar ka tirsan ciiddanka Kenya oo la sheegay inay dhirbaaxo ku dhufteen, kaddibna hub ka dhigis ku sameeyeen ciidamo ka tirsan kuwa booliska oo ku sugnaa bar Kaantarool, kadib markii ay booliska ka daaheen inay birta ka qaadaan Kaantaroolka waddada kuyaal.
About The Author
