Wararka ka imaanaya waddanka Itoobiya, ayaa sheegaya in weerar hubeysan oo ay fuliyeen kooxo aan haybtooda la aqoon lagu dilay masuuliyiin ka tirsan ismaamulka Axmaarada ee dhaca waqooyiga dalka Itoobiya.
Weerarka oo u muuqday mid si wayn loo qorsheeyay ayaa lagu beegsaday, laguna dilay gudoomiyihii degmada Lasta ugu magacownaa ismaamulka Amhara, Getachew Mulse iyo Million Afewerk oo ah madaxa xafiiska caafimaadka ee degmadaasi.
Ilo wareedyo ku sugan gobolka ayaa warbaahinta maxalliga ah u sheegay in kooxo hubeysan ay dhexda u galeen masuuliyiinta, xilli ay kasoo noqdeen shir ka dhacay magaalada Woldia ee xarunta gobolka Woqooyiga Wolo ee ismaamulka Amhara.
Goobjoogeyaal ayaa sheegay inay maqlayeen rassaasta lagu dilay masuuliyiintan ka tirsan ismaamulka Axmaarada, goobta lagu helay saraakiishan ayay ilo wareedyadu ku sheegeen meel u dhow magaalada Kulmusk oo aan ka fogeyn Lalibela, Qaar kale oo ka mid ah goobjoogeyaasha dhacdada ayaa sheegay in mas’uuliyiintan ka tirsan maamulka degmada iyo kan gobolka ay si wada jir ah u wada socdeen.
Laba ilo wareed ayaa warbaainta deegaanka u sheegay in saraakiil kale oo ka tirsan dowladda Itoobiya oo masuuliyiintan la dilay la socoday ay safarkii hakiyeen, kaas oo ay ku tagi lahaayeen magaalada Lalibela, waxaana ay dib u laabteen oo ay ku nagaadeen magaalada Kulmusk oo duleedka uu weerarku ka dhacay.
Goobjooge kale oo ka shaqeeya xarunta maamulka degmada oo magaciisa qariyay ayaa warbaahinta maxalliga ah u xaqiijiyay in weerarkaas lagu dilay 2 guddoomiye degmo iyo sidoo kale madaxii caafimaadka ee degmada Lasta, isagoo tilmaamay in uu arkay warqad tacsi oo lagu dhajiyay dhismaha xafiisyada maamulka degmada, kuwaas oo lagu sheegay in uu geeriyooday madaxii xafiiska caafimaadka degmada Ato Million Afewerk.
Dadka Itoobiyaanka ah ee isticmaala barta X, waxay sheegeen in weerarkaasi ay ka dambeysay Fano, oo ah jabhad hubeysan oo kacdoon millatari kula jirta dowladda Itoobiya ee uu ra’iisul wasaaraha u yahay Abiy Axmed, inkastoo aysan jirin sheegasho rasmi ah.
About The Author
