Wararka ka imaanaya ismaamulka Marsabit ee Kenya, ayaa sheegaya in iska hor’imaad hubeysan uu ka dhacay god macdanta laga qodo oo kuyaal deegaan hoostaga magaalada Mooyaale.
Inta la hubiyay ugu yaraan laba xubnood oo uu ku jiro sarkaal booliis ah oo ka tirsan ciidamada Kenya, ayaa lagu dilay iska hor’imaadka oo si gaar ah kaga dhacay goobta macdanta laga qoto ee kuyaal deegaanka Hilo ee ka tirsan magaalada Mooyaale ee dhacda xuduud beenaadka.
Wararka la helay waxay intaas ku darayaan in maleeshiyada weerarka gaystay ay u suuragshay inay goobta kala baxsadaan qoriga nooca G3-ga loo yaqaan iyo 20 baalooto oo rasaas ah oo uu lahaa sarkaalka Kenyatiga ah ee la khaarajiyay.
Warbaahinta maxalliga ee Kenya, waxay sheegtay in sarkaalkan booliska ka tirsan ee la dilay lagu magacaabi jiray George Mukoma, kaas oo ka mid ahaa saraakiisha ilaalada ka hayay goobta macdanta laga qodayay gaar ahaan Dahabka.
Sarkaal u hadlay Booliiska dowladda Kenya, ayaa sheegay in ugu yaraan 10 xubnood oo ay ku jiraan saraakiil booliis ah ay sidoo kale dhaawacyo kala duwan kasoo gaareen iska hor’imaadka goobta ka dhacay.
Booliska Kenya, waxay sheegeen in koox hubeysan oo kumannaan ah ay xoog ku galeen aaga goobta macdanta laga qodo, halkaas oo ay weeraro kula galeen saraakiisha booliska.
About The Author
