Dowladda Eritrea ayaa shaacisay inay si rasmi ah u joojin doonto xiriirkii dhanka hawada ee kala dhaxeeyay Itoobiya, kaasi oo oo dib loo soo celiyay 2018-kii.
Shirkadda duulimaadyada Itoobiya ayaa sheegtay inay heshay ogaysiis kasoo baxay Hay’adda duulista hawada ee Eritrea, taasi oo soo gaarsiisay warqad rasmi ah oo ay ku tilmaamayso joojinta dhammaan duullimaadyadii shirkadda Ethiopian Airlines ay ka samayn jirtay waddanka Eritrea, laga bilaabo 30-ka Sebtember ee soo socota.
Shirkadda duulimaadyada Itoobiya waxay sheegtay inaysan helinsababaha gaarka ah ee hakinta duulimaadyada diyaaradaha keentay, waxayna macaamiisheeda u sheegtay ogayskiiska ay heshay oo kaliya.
Dhinaca kale warqad la sheegay in ay qortay hay’adda duulista hawada ee Eritrea oo lagu faafiyay baraha bulshada ayaa lagu shaaciyay joojinta duulimaadka ee ay sheegtay shirkadda duulimaadka Itoobioya.
Dowladda Eritrea waxay sheegtay in go’aankeedan uu sabab u yahay dhaqannada ganacsi ee Itoobiya oo ay sheegtay inay yihiin kuwa xaasidnimo ku dhisan, si gaar ahna shirkadaha diyaaradaha ee Itoobiya kuwaas oo ay ku eedeysay inay xatooyo ku sameeyaan boorsooyinka rakaabka Eritreanka ah.
Waxay sidoo kale dowladda Eritrea duulimaadyada shirkadaha Itoobiya ku eedeysay daahitaan dheer oo dhanka rakaabka Ertireanka ah, sicir bararka oo ah mid xad ka bax ah oo aysan shirkaddu qiil u haynin & khaladaad kale oo badan.
Waxaa warqaddaasi lagu cadeeyay in caqabadahaasi awgeed ay Eritrea u joojinayso dhammaan duullimaadyadii shirkadda Ethiopian Airlines ay ka samayn jirtay Eritrea, marka ay taariikhdu ku began tahay 30-ka Sebtembar 2024.
Waxa xusid mudan in shirkada duulimaadyada Itoobiya ay duulimaadkeeda Asmara dib u bilowday 17-kii July 2018-kii, kolkaas oo ay si caadi ah kusoo noqdeen xiriirka labada dhinac ee Itoobiya iyo Eritrea.
About The Author
