Dowladda Ukraine ayaa si rasmi ah u shaacisay maanta oo Khamiis ah in diyaarad nooca casriga ah ee F-16 ah oo Mareykanku ugu deeqay ay ka burburtay, duuliyihii wadayna uu dhintay, xilli uu ka hortegayay weerar ballaaran oo Ruushku ku qaaday gudaha waddanka Ukraine.
Taliska ciidamada ee Ukraine ayaa sheegay in marka hore ay waayeen xiriirkii ay la lahaayeen mid ka mid ah diyaaradahaasi casriga ah, waxaana markii dambe ay dib ka heleen warbixin xaqiijinaysa in diyaaradu dhacday oo ay burburtay, uuna halkaas ku dhintay duuliyaheedii.
Wargayska lagu magacaabo Wall Street Journal oo soo xiganaysa sarkaal Mareykan ah ayaa dhankiisa sheegay in wararkii ugu horreeyay ay muujinayaan in diyaaradda aysan soo ridin Ruushka, inkastoo buu yiri uu shilku uu dhacay xilli gantaallo aad u waaweyn uu Ruushku ku garaacayay guud ahaan waddankaasi, isagoo tilmaamay in shilkan uu badan yahay mid ku yimid natiijada qaladka duuliyaha.
Waxaa xusid mudan in diyaaradda burburtay ay toddobaadyo uun ka hor Ukraine ka heshay dhanka dowladda Maraykanka, duuliyaha ku dhintay shilka diyaaradda ayaa isagana duulista loo tabobararay muddo laba sano ah.
Madaxweynaha dowladda Ukraine Faladamiir Zelensky ayaa xaqiijiyay in dalkiisa uu markii ugu horeysay dagaalka uu ku jiro u adeegsaday diyaaradaha F-16, si loo soo rido gantaalada Ruushka toddobaadkan.
4-tii bisan Agoosto ayay ahayd markii xukuumadda fadhigeedu yahay Kiyeef ay shaacisay in ay heshay diyaaraddii ugu horeysay ee nooca casriga ah ee F-16 oo ka mid ah siddeetan diyaaradood oo ay ballanqaaday xukuumadda Washington, balse sarkaal Maraykankan ah ayaa warbaahinta u xaqiijiyay in Ukraine ay heshay kaliya 6 diyaaradood oo F-16, ayna leedahay 6 duuliye oo keliya oo loo tababaray duulista, kaasi oo mid ka mid ah uu maanta dhintay.
About The Author
