Khasaare laxaad leh oo isugu jira dhimasho iyo dhaawac ayaa ka dhashay shil diyaaradeed oo laga soo tabiyay garoon caalami ah oo kuyaal dalka Kuuriyada koonfureed, halkaas oo ay ku dhinteen ku dhawaad 180 xubnood, shilkan ayaa lagu sheegay midkii ugu khasaaraha badnaa ee ka dhaca dalka Kuuriyada koonfureed.
Dowladda Kuuriyada Koonfureed waxay shaacisay in ugu yaraan 179 qof ku dhinteen dab ka kacay diyaarad rakaab ah, xilli ay ku degeysay garoonka caalamiga Muan ee kuyaal magaalada Muan, oo qiyaastii 288 km dhanka koonfur-galbeed ka xigta magaalada caasimadda ah ee Seoul.
Ilo wareedyo xog-ogaal ah ayaa soo sheegay in diyaarada oo ay saarnaayeen 181 xubnood oo 6 ka mid ah ay yihiin shaqaalaha diyaarada uu ka kacay dab xoog leh, kaddib markii ay ka leexatay dhabbaha ay diyaaraduhu ku ordaan, taasi oo keentay inay ku dhacdo darbi kuyaal garoonka caalamiga ah.
Waaxda gurmadka degdega ah ee Kuuriyada koonfureed waxay sheegtay in ciladdu u badan tahay inay ka timid dhanka qalabka diyaaradda lagu dejiyo, inkastoo aysan soo bandhigin sababta rasmiga ah ee keentay burburkeeda, wallow la arkayay in diyaaraddu u bixi waayeen taayirada, sidaas na ugu dhacday darbiga.
Wakaalada wararka ee Yonhap, waxay dhankeeda sheegtay diyaaraddan oo nooceedu ahaa Boeing 737-800 ay kasoo kicitantay magaalada Bangkok ee caasimadda Thailand, shilkaasina uu dhacay markii ay caga dhigatay.
Muuqaallo lagu faafiyay baraha bulshada ayaa muujinayay qaabka uu shilku u dhacay, waxaana la arkayay diyaaradda oo ka weecanaysa dhabbihii ay ku degeysay, kuna dhacayso darbi kuyaal garoonka, kaddibna uu ka kacayo dab xoog leh.
Khasaaraha ayaa marba marka ka dambeysa sii kordhayay, tirakoobkii ugu horreeyay ee la diiwaan geliyay ayaa ahaa dhimashada 23 qof, saacado kooban gudahood na uu sameeyay koror xad-dhaaf ah, iyadoo numberkii ugu dambeeyay la xaqiijiyay, waxayna tirada guud ee dhimashadu sidaas ku noqotay 179 xubnood.
Wakaaladda wararka ee Reuters oo soo xiganayso ilo wareed dhanka kooxaha samatabixinta waxay sheegtay in kaliya lagu guuleystay in lasoo badbaadiyo laba ka mid ah shaqaalaha diyaaraddaasi oo nool, dhammaan intii kale ee diyaaradda saarnayd oo 179 xubnood ahaa ayaa dhintay.
Sawirro ay heshay wakaaladda wararka ee Reuters ayaa muujinayay burburka baaxadda leh ee ka dhashay shilkan diyaaradeed oo wakaaladdu ku tilmaantay kii ugu khasaaraha badnaa abid ee ka dhaca Kuuriyada koonfureed.
Hoos Ka Daawo Sawirrada Shilkan Diyaaradeed.
About The Author
